எல்லை தாண்டி மீன்பிடித்ததாகக் கூறி பாம்பனை சேர்ந்த 33 மீனவர்களை இலங்கை கடற்படையினர் கைது செய்தனர்.
பாம்பனை சேர்ந்த அலெக்ஸ், ரஞ்சன், சார்லஸ் மற்றும் சூசை மார்டின் ஆகியோருக்கு சொந்தமான 4 நாட்டுப் படகுகளில் 33 மீனவர்கள், கடந்த 6ஆம் தேதி கடலுக்கு சென்றனர்.
இந்நிலையில் இலங்கை மன்னார் தென்கடல் பகுதியில் மீன்பிடித்துக் கொண்டிருந்த மீனவர்கள் அனைவரையும் எல்லை தாண்டி மீன்பிடித்ததாகக் கூறி இலங்கை கடற்படை கைது செய்ததுடன் அவர்களது 4 நாட்டுப் படகுகளையும் பறிமுதல் செய்தது.
இதனையடுத்து கைதான மீனவர்களையும், படகையும் புத்தளம் மாவட்டம் கல்பிட்டி கடற்படை தளத்துக்கு இலங்கை கடற்படை அழைத்துச் சென்றதாக தகவல் வெளியாகியுள்ளது.
நேற்று தமிழக மீனவர்கள் 13 பேரை இலங்கை நீதிமன்றம் விடுதலை செய்த நிலையில் தற்போது 33 மீனவர்கள் கைது செய்யப்பட்டிருப்பது பாம்பன் மீனவர்களிடையே கொந்தளிப்பை ஏற்படுத்தியுள்ளது.
