உலகக்கோப்பை ஹாக்கி 2026: நெதர்லாந்திடம் 1-3 என வீழ்ந்த இந்தியா.. அரையிறுதி வாய்ப்பு பறிபோனது!

Estimated read time 1 min read

நெதர்லாந்து:2026 ஆடவர் உலகக்கோப்பை ஹாக்கி தொடரின் இரண்டாவது சுற்றுப் போட்டியில் பலம் வாய்ந்த நெதர்லாந்து மற்றும் இந்திய அணிகள் மோதின. நெதர்லாந்தின் ஆம்ஸ்டெல்வீன் (Amstelveen) நகரில் நடைபெற்ற இந்த முக்கியமான போட்டியில், 1-3 என்ற கோல் கணக்கில் இந்திய அணி பரிதாபமாகத் தோல்வியைத் தழுவியது.

முதல் பாதியில் கோல் இல்லை

ஆட்டத்தின் தொடக்கம் முதலே இரு அணிகளும் ஆக்ரோஷமான ஆட்டத்தை வெளிப்படுத்தின. இந்திய அணியின் தடுப்பாட்டம் மிகச் சிறப்பாக இருந்ததால் முதல் பாதியில் இரு அணிகளாலும் எந்த கோலும் அடிக்க முடியவில்லை.

ஆனால் ஆட்டத்தின் 41வது நிமிடத்தில் நெதர்லாந்து வீரர் டுகோ டெல்கென்காம்ப் முதல் கோலை அடித்து அணியின் கணக்கைத் தொடங்கி வைத்தார். தொடர்ந்து 51வது நிமிடத்திலும் அந்த அணி தனது இரண்டாவது கோலைப் பதிவு செய்து இந்திய அணிக்கு நெருக்கடி கொடுத்தது.

ஹர்மன்பிரீத் சிங்கின் ஆறுதல் கோல்

0-2 எனப் பின்தங்கிய நிலையில் இந்திய அணி கடுமையாகப் போராடியது. ஆட்டத்தின் 52வது நிமிடத்தில் கிடைத்த பெனால்டி கார்னர் வாய்ப்பைப் பயன்படுத்தி இந்திய அணியின் கேப்டன் ஹர்மன்பிரீத் சிங் ஒரு அபாரமான கோலை அடித்தார்.

ஆனால் கோல் அடித்த சிறிது நேரத்திலேயே அவர் முதுகுவலியால் மைதானத்தை விட்டு வெளியேறியது இந்திய அணிக்குப் பெரும் பின்னடைவாக அமைந்தது. இதை சாதகமாகப் பயன்படுத்திய நெதர்லாந்து அணி 55வது நிமிடத்தில் தனது 3வது கோலை அடித்து வெற்றியை முழுமையாக உறுதி செய்தது.

அரையிறுதி வாய்ப்பு பறிபோனது

இந்த அதிர்ச்சித் தோல்வியின் மூலம் 2026 உலகக்கோப்பைத் தொடரின் அரையிறுதிக்கு முன்னேறும் வாய்ப்பை இந்திய அணி முற்றிலும் இழந்துள்ளது. மறுபுறம், சொந்த மண்ணில் விளையாடிய நெதர்லாந்து அணி இந்த வெற்றியின் மூலம் அரையிறுதிக்குத் தகுதி பெற்றுள்ளது.

அரையிறுதி வாய்ப்பை இழந்த இந்திய அணி, இனி 5 முதல் 8 வரையிலான இடங்களைப் பிடிப்பதற்கான வகைப்படுத்தல் (Classification) போட்டிகளில் பலம் வாய்ந்த அர்ஜென்டினாவை எதிர்கொள்ள உள்ளது.

Please follow and like us:

You May Also Like

More From Author