தமிழ் சினிமாவில் சிவாஜி கணேசன், ரஜினிகாந்த் எனப் பல முன்னணி நடிகர்களுடன் நடித்துப் புகழ்பெற்றவர் நடிகை அம்பிகா. சிவாஜி மற்றும் அவரது மகன் பிரபு ஆகிய இருவருக்கும் ஜோடியாக நடித்த இவர், தற்போது சிவாஜியின் பேரன் விக்ரம் பிரபுவுக்குத் தாயாகவும் நடித்துள்ளார்.
சமீபத்திய பேட்டி ஒன்றில் பங்கேற்ற அவர், மறைந்த நடிகர் விஜயகாந்துடன் தனக்கு இருந்த நட்பு குறித்துப் பல சுவாரசியமான தகவல்களைப் பகிர்ந்து கொண்டார்.
குறிப்பாக, “விஜயகாந்துடன் நடிக்க நான் மறுத்ததாகச் சொல்லப்படும் தகவல் முற்றிலும் பொய்யானது; அவரிடம் எனது புகைப்படத்தைத் தூக்கி எறிந்ததாக யாரோ தவறாகக் கூறியுள்ளனர்” என்று அம்பிகா விளக்கம் அளித்துள்ளார்.
விஜயகாந்த் மீது தமக்கு ஒரு அன்பான கோபம் இன்னும் இருப்பதாக அம்பிகா அந்தப் பேட்டியில் உருக்கமாகக் கூறியுள்ளார். ” விஜயகாந்த் தனது உடல்நிலையைச் சரியாகக் கவனித்துக் கொள்ளாமல் விட்டுவிட்டாரே என்பதுதான் என் கோபம்.
அவர் தனது ஆரோக்கியத்தில் அக்கறை காட்டியிருந்தால், இன்று தமிழகத்திற்கு ஒரு மிகச்சிறந்த முதல்வர் கிடைத்திருப்பார்; ஒரு நல்ல தலைவரை நாம் இழந்திருக்க மாட்டோம்” என்று அவர் வருத்தத்துடன் தெரிவித்துள்ளார்.
சினிமாவைத் தாண்டி விஜயகாந்தின் உதவும் குணத்தையும், அவரது எதிர்காலத் திட்டங்கள் குறித்தும் அந்தப் பேட்டியில் அம்பிகா நெகிழ்ச்சியுடன் நினைவுகூர்ந்துள்ளார்.
