திருப்பதி ஏழுமலையான் கோயிலில் நவராத்திரி பிரம்மோற்சவத்தின் ஐந்தாம் நாள் உற்சவத்தில் மோகினி அவதாரத்தில் மலையப்ப சுவாமி நாச்சியார் திருக்கோலத்தில் எழுந்தருளி பக்தர்களுக்கு அருள்பாலித்தார்.
திருப்பதி ஏழுமலையான் கோயிலில் நவராத்திரி பிரம்மோற்சவ விழா கடந்த 12ஆம் தேதி முதல் கோலாகலமாக நடைபெற்று வருகிறது. நாள்தோறும் காலை, மாலை என இருவேளைகளில் மலையப்ப சுவாமி பல்வேறு வாகனங்களில் எழுந்தருளி பக்தர்களுக்கு காட்சியளித்து வருகிறார்.
அந்த வகையில், நவராத்திரி பிரம்மோற்சவ விழாவின் 5ஆம் நாள் உற்சவத்தில் மோகினி அவதாரத்தில் மலையப்ப சுவாமி நாச்சியார் திருக்கோலத்தில் எழுந்தருளினார். மற்றொரு பல்லக்கில் ஸ்ரீகிருஷ்ணர் அலங்காரத்தில் மலையப்ப சுவாமி பக்தர்களுக்கு அருள்பாலித்தார். நான்கு மாடவீதியில் மலையப்ப சுவாமி வீதி உலா வந்தபோது லட்சக்கணக்கான பக்தர்கள் திரண்டு கோவிந்தா, கோவிந்தா என கோஷம் எழுப்பி சாமி தரிசனம் செய்தனர். வீதி உலாவின்போது பக்தர்களின் கலைநிகழ்ச்சிகளும் இடம்பெற்றன.
