சட்டம் மற்றும் ஒழுங்கு தொடர்பான விபரங்களை தகவல் அறியும் உரிமைச் சட்டத்தின் கீழ் வழங்கக் கூடாது என்று முன்னர் பிறப்பிக்கப்பட்ட அரசாணை தற்போது முழுமையாக ரத்து செய்யப்பட்டுள்ளது. இந்த உத்தரவானது பொதுமக்கள் மற்றும் சமூக ஆர்வலர்கள் மத்தியல் பெரும் வரவேற்பைப் பெற்றுள்ளது.
முன்னதாக, சட்டம்-ஒழுங்கு விவகாரங்கள் மற்றும் அது தொடர்பான ரகசிய அல்லது முக்கியமான விவரங்களை ஆர்டிஐ மூலம் வழங்கப்படாது என்ற அரசாணை பிறப்பிக்கப்பட்டிருந்தது. இந்த முந்தைய உத்தரவிற்கு தமிழகத்தில் உள்ள அரசியல் கட்சிகள் மற்றும் பல்வேறு சமூக ஆர்வலர்கள் தரப்பிலிருந்து மிகக் கடுமையான எதிர்ப்புகள் கிளம்பின.
தகவல் அறியும் உரிமைச் சட்டம் என்பது பொதுமக்களின் அடிப்படை உரிமை என்பதால், இதில் இதுபோன்ற கட்டுப்பாடுகளை விதிக்கக் கூடாது என அவர்கள் தொடர்ந்து குரல் கொடுத்து வந்தனர். இதனைத் தொடர்ந்து, சமூக ஆர்வலர்கள் மற்றும் அரசியல் கட்சிகள் தெரிவித்த கடும் எதிர்ப்புகளை கருத்தில் கொண்டு, அரசு அந்த முந்தைய அரசாணையை இப்போது ரத்து செய்துள்ளது.
இதன் மூலம், சட்டம் மற்றும் ஒழுங்கு தொடர்பான விவரங்களை இனி சட்ட விதிகளுக்கு உட்பட்டு தகவல் அறியும் உரிமைச் சட்டம் (ஆர்டிஐ) மூலமாகப் பெற்றுக்கொள்ள வழிவகை செய்யப்பட்டுள்ளது. இந்த மாற்றத்தின் வாயிலாக, வெளிப்படைத்தன்மை மேலும் உறுதிப்படுத்தப்படும் என்றும், பொதுமக்கள் தங்களுக்குத் தேவையான சட்டப்பூர்வ தகவல்களைத் தடையின்றிப் பெற முடியும் என்றும் எதிர்பார்க்கப்படுகிறது.
