தமிழக பாரதிய ஜனதா கட்சியிலிருந்து அண்ணாமலை அதிரடியாக விலகியதைத் தொடர்ந்து, அக்கட்சியில் உள்ள அவரது ஆதரவாளர்கள் மற்றும் முக்கிய நிர்வாகிகள் பலரும் அடுத்தடுத்து தங்களது விலகல் அறிவிப்பை சமூக வலைத்தளங்களில் வெளியிட்டு வருவது கமலாலய வட்டாரத்தைப் பேரதிர்ச்சியில் ஆழ்த்தியுள்ளது. அந்த வகையில், பாஜகவின் மீனவர் பிரிவு மாநில தலைவராக இருக்கும் நீலாங்கரை முனுசாமி, தான் கட்சியின் அனைத்துப் பொறுப்புகளில் இருந்தும், அடிப்படை உறுப்பினரிலிருந்தும் விலகுவதாக நெல்லை சட்டமன்ற உறுப்பினரும் மூத்த தலைவருமான நயினார் நாகேந்திரனுக்கு அதிரடியாகக் கடிதம் அனுப்பியுள்ளார்.
நீலாங்கரை முனுசாமியின் இந்த விலகல் கடிதம் இணையத்தில் தீயாய் பரவி வரும் நிலையில், கட்சிக்குள் இருக்கும் அண்ணாமலையின் தீவிர ஆதரவாளர்களான ஐடி விங் (IT Wing) நிர்வாகிகள் பலரும் தங்களது பதவிகளை ராஜினாமா செய்யத் தயாராகி வருவதாகத் தகவல்கள் கசிந்துள்ளன. மேலும், கடந்த தேர்தல்களில் சீட் கிடைக்காமல் அதிருப்தியில் இருந்த முக்கிய முகங்கள் மற்றும் தற்போதைய முக்கிய நிர்வாகிகள் பலரும், அண்ணாமலை தொடங்கவுள்ள புதிய அமைப்பில் தங்களை இணைத்துக் கொள்ளப் போவதாகப் பரவி வரும் அதிரடித் தகவல், தமிழக பாஜகவுக்குள் மிகப்பெரிய உள்கட்சிப் புயலையும், அரசியல் அதிர்வுகளையும் கிளப்பியுள்ளது.
