உலகில் மிகவும் அமைதியாக விளங்கும் நாடுகளின் பட்டியலை உள்ளடக்கிய ‘உலகளாவிய அமைதிக்குறியீடு 2026’ அதிகாரப்பூர்வமாக வெளியிடப்பட்டுள்ளது. லண்டனைத் தலைமையிடமாகக் கொண்டு இயங்கும் ‘பொருளாதாரம் மற்றும் அமைதிக்கான நிறுவனம்’ ஆண்டுதோறும் இந்த ஆய்வறிக்கையை வெளியிட்டு வருகிறது. உலகின் 163 நாடுகள் மற்றும் தன்னாட்சிப் பிரதேசங்களில் நிலவும் உள்நாட்டுப் பாதுகாப்பு, அண்டை நாடுகளுடனான உறவு, ராணுவமயமாக்கல் மற்றும் வன்முறைகள் போன்ற 23 முக்கிய காரணிகளை அடிப்படையாகக் கொண்டு இந்தத் தரம் பிரிக்கப்பட்டுள்ளது.
வாசகர்களுக்கு அதிர்ச்சியளிக்கும் வகையில், இந்த ஆண்டு வெளியிடப்பட்டுள்ள உலகளாவிய அமைதிப் பட்டியலில் இந்தியாவின் தரவரிசை பெருமளவு சரிவைக் கண்டுள்ளது. கடந்த 2025-ஆம் ஆண்டு வெளியிடப்பட்ட பட்டியலில் இந்தியா 115-வது இடத்தில் இருந்தது. ஆனால், தற்போதைய புதிய அறிக்கையின்படி இந்தியா கடந்த ஆண்டை விட 12 இடங்கள் பின்னோக்கிச் சரிந்து, 127-வது இடத்தைப் பிடித்துள்ளது. அண்டை நாடுகளுடனான எல்லைப் பதற்றங்கள், உள்நாட்டுப் பாதுகாப்பு சவால்கள் மற்றும் அதிகரித்துள்ள ராணுவ தளவாட இறக்குமதிகள் போன்றவையே இந்தியாவின் இந்தத் தரவரிசைச் சரிவுக்கு முக்கியக் காரணங்களாகக் கூறப்படுகின்றன.
மறுபுறம், உலகிலேயே மிகவும் அமைதியான நாடாக ஐஸ்லாந்து தனது முதலிடத்தைத் தக்கவைத்துக் கொண்டு சாதனை படைத்துள்ளது. கடந்த 19 ஆண்டுகளாக ஐஸ்லாந்து இந்த முதலிடத்தில் நீடித்து வருவது குறிப்பிடத்தக்கது. அதனைத் தொடர்ந்து நியூசிலாந்து, சுவிட்சர்லாந்து, சுலோவேனியா மற்றும் அயர்லாந்து ஆகிய நாடுகள் முறையே அடுத்தடுத்த இடங்களைப் பிடித்து உலகின் டாப்-5 அமைதியான நாடுகளாகத் திகழ்கின்றன. தெற்காசிய நாடுகளைப் பொறுத்தவரை, பூடான் 16-வது இடத்தைப் பிடித்து இப்பிராந்தியத்தில் மிகவும் அமைதியான நாடாக முதன்மை பெற்றுள்ளது.
இலங்கை கணிசமான முன்னேற்றத்துடன் 67-வது இடத்திலும், நேபாளம் 111-வது இடத்திலும், வங்கதேசம் 117-வது இடத்திலும் இந்தியாவுக்கு முன்னிலையில் உள்ளன. பாகிஸ்தான் 152-வது இடத்திலும், ஆப்கானிஸ்தான் 157-வது இடத்திலும் உள்ளன. தொடர்ந்து நீடித்து வரும் உக்ரைன் – ரஷ்யா போர், இஸ்ரேல் – காசா மோதல்கள் மற்றும் உலகளாவிய புவிசார் அரசியல் பதற்றங்கள் காரணமாக ஒட்டுமொத்த உலக அமைதியின் அளவும் இந்த ஆண்டில் பெருமளவு குறைந்துள்ளதாக இந்த அறிக்கை சுட்டிக்காட்டுகிறது. இந்தப் பட்டியலில் போர்ச் சூழலில் உள்ள ரஷ்யா, சூடான், காங்கோ, உக்ரைன் மற்றும் இஸ்ரேல் ஆகிய நாடுகள் உலகின் மிகக் குறைந்த அமைதியற்ற நாடுகளின் வரிசையில் கடைசிப் பக்கங்களில் இடம் பிடித்துள்ளன.
