கேரள மாநிலம் இடுக்கியில் காட்டற்று வெள்ளம் மற்றும் நிலச்சரிவு ஏற்பட்டு 9 பேர் பலியாகி உள்ள நிலையில் மேலும் சிலரை தேடும் பணி தீவிரமாக நடைபெற்று வருகிறது.
கனமழை காரணமாக கொட்டப்புழா ஆற்றில் கடுமையான வெள்ளப்பெருக்கு ஏற்பட்டு 6 பேர் தண்ணீரில் அடித்து செல்லப்பட்டனர். இவர்களில் 5 பேர் சடலங்களாக மீட்கப்பட்டனர்.
மேலும் ஒருவரை தேடும் பணியில் மீட்புப்படையினர் தீவிரமாக ஈடுபட்டு வருகின்றனர். இதற்கிடையே வேலத்துச்சேரியில் ஏற்பட்ட நிலச்சரிவில் தமிழகத்தைச் சேர்ந்த சங்கீதா அருள் லால் என்பவர் உயிரிழந்துள்ளார். அவரது உடலை மீட்ட மீட்புக் குழுவினர் மற்றொருவரை தேடும் பணியில் ஈடுபட்டு வருகின்றனர்.
கனமழை காரணமாக கொட்டக்கம்பூர் பகுதியில் தற்காலிக குடில் அமைக்கப்பட்டிருந்த நிலையில் அதன் மீது மண் சரிவு ஏற்பட்டது, இந்த பேரிடரில் 2 பேர் சம்பவ இடத்திலேயே உயிரிழந்தனர். கனமழை காரணமாக வெவ்வேறு பகுதிகளில் நடந்த பேரிடர் விபத்தில் 9 பேர் பலியான சம்பவம் அப்பகுதி மக்களிடையே சோகத்தை ஏற்படுத்தி உள்ளது.
