டெல்லி : 2027-ஆம் ஆண்டு நடைபெற உள்ள ஒருநாள் உலகக் கோப்பை கிரிக்கெட் தொடருக்கான இந்திய அணியைத் தேர்வு செய்யும்போது, விராட் கோலி மற்றும் ரோஹித் சர்மா ஆகிய மூத்த வீரர்களின் வயது ஒரு தடையாக இருக்காது என்று இந்திய கிரிக்கெட் கட்டுப்பாட்டு வாரியத்தின் (BCCI) தலைவர் மிதுன் மன்ஹாஸ் தெளிவுபடுத்தியுள்ளார். வீரர்களின் தற்போதைய உடற்தகுதி மற்றும் ஆட்டத்திறன் (Performance) ஆகிய இரண்டு அம்சங்கள் மட்டுமே முக்கியத் தகுதியாகக் கருதப்படும் என்று அவர் குறிப்பிட்டுள்ளார்.
இதுகுறித்து ஸ்போர்ட்ஸ்டார் ஊடகத்திற்கு அளித்த பிரத்யேக நேர்காணலில் பேசிய பிசிசிஐ தலைவர் மிதுன் மன்ஹாஸ், உலகக் கோப்பை தொடருக்கான இறுதி அணியைத் தேர்வு செய்வது என்பது முழுக்க முழுக்கத் தேர்வுக் குழுவினர் மற்றும் பயிற்சியாளர்களின் முடிவைப் பொறுத்தது என்று கூறியுள்ளார்.
இருப்பினும், தனது தனிப்பட்ட பார்வையில் வயது என்பது கிரிக்கெட் விளையாட்டிற்கு ஒரு அளவுகோல் கிடையாது என்றும், நாட்டின் வெற்றிக்காகப் பங்களித்து, நல்ல உடற்தகுதியுடன் சிறப்பாக விளையாடும் எந்தவொரு வீரருக்கும் அணியில் வாய்ப்பு வழங்கப்பட வேண்டும் என்பதே தனது கருத்து என்றும் விளக்கியுள்ளார்.
கடந்த 2024-ஆம் ஆண்டு டி20 உலகக் கோப்பையை இந்திய அணி வென்ற பிறகு, விராட் கோலி மற்றும் ரோஹித் சர்மா ஆகிய இருவரும் டி20 மற்றும் டெஸ்ட் கிரிக்கெட் போட்டிகளில் இருந்து ஓய்வு பெற்றுவிட்டதால், அவர்கள் தற்போது ஒருநாள் (ODI) போட்டிகளில் மட்டுமே கவனம் செலுத்தி வருகின்றனர்.
அடுத்த ஆண்டு தென் ஆப்பிரிக்கா, ஜிம்பாப்வே மற்றும் நமீபியா ஆகிய நாடுகளில் நடைபெற உள்ள உலகக் கோப்பை தொடருக்கு இன்னும் ஒரு வருடமே உள்ள நிலையில், இவர்களின் அனுபவம் இந்திய அணிக்குக் கூடுதல் பலமாக இருக்கும் என்று எதிர்பார்க்கப்படுகிறது.
தற்போது இந்திய ஒருநாள் மற்றும் டெஸ்ட் கிரிக்கெட் அணியின் கேப்டனாகப் பொறுப்பேற்றுள்ள இளம் வீரர் சுப்மன் கில்லுக்கு, இந்த இரு மூத்த வீரர்களின் வழிகாட்டுதல் மிகவும் அவசியமானது என்றும் பிசிசிஐ தலைவர் மன்ஹாஸ் சுட்டிக்காட்டியுள்ளார். குஜராத் டைட்டன்ஸ் அணி மற்றும் இந்திய அணியை வழிநடத்திய அனுபவம் சுப்மன் கில்லுக்கு இருந்தாலும், உலகக் கோப்பை போன்ற பெரிய தொடர்களில் விராட் கோலி, ரோஹித் சர்மா மற்றும் ஹர்திக் பாண்டியா போன்ற சீனியர் வீரர்கள் மைதானத்தில் அருகில் இருப்பது அவருக்குப் பெரும் பக்கபலமாக இருக்கும் என்று அவர் கூறியுள்ளார்.
