திமுக முன்னாள் அமைச்சரும் அக்கட்சியின் மூத்த தலைவருமான எ.வ.வேலுவிடம் லஞ்ச ஒழிப்புத் துறையினர் (DVAC) நேற்று சுமார் 5 மணி நேரம் தீவிர விசாரணை நடத்தினர். சென்னை ஆலந்தூரில் உள்ள லஞ்ச ஒழிப்புத்துறை இயக்குநர் அலுவலகத்தில் நடைபெற்ற இந்த விசாரணை, தற்போதைய தவெக (தமிழக வெற்றிக் கழகம்) அரசு பொறுப்பேற்ற பிறகு திமுக முன்னாள் அமைச்சர் மீது எடுக்கப்பட்டுள்ள முதல் பெரிய சட்ட நடவடிக்கை என்பதால் தமிழக அரசியலில் பெரும் பரபரப்பை ஏற்படுத்தியுள்ளது.
கடந்த 2022-ஆம் ஆண்டு திமுக ஆட்சிக்காலத்தில் கரூரில் சாலை உள்கட்டமைப்புப் பணிகளைச் செய்யாமலேயே தனியார் நிறுவனத்திற்குப் பணம் விடுவிக்கப்பட்டதாக ‘அறப்போர் இயக்கம்’ அளித்த புகாரின் அடிப்படையில் இந்த வழக்குப் பதிவு செய்யப்பட்டது. முன்னதாக, இந்த வழக்கில் லஞ்ச ஒழிப்புத்துறை அவருக்கு சம்மன் அனுப்பியிருந்த நிலையில், அவர் மருத்துவ சிகிச்சைக்காகச் சிங்கப்பூர் சென்றதால் ‘லுக் அவுட்’ நோட்டீஸ் பிறப்பிக்கப்பட்டது. இதனை எதிர்த்து சென்னை உயர் நீதிமன்றத்தில் வேலு தொடர்ந்த வழக்கில், அவருக்குக் கடுமையான நடவடிக்கைகள் எடுக்க இடைக்காலத் தடை விதித்த நீதிமன்றம், ஜூலை 15-க்குள் விசாரணை அதிகாரி முன்னிலையில் ஆஜராக வேண்டும் என்று நிபந்தனை விதித்திருந்தது
அதன்படி, நேற்று காலை 10:45 மணிக்கு லஞ்ச ஒழிப்பு அலுவலகத்திற்கு வந்த எ.வ.வேலுவிடம், மாலை 3:15 மணி வரை அதிகாரிகள் அடுக்கடுக்கான கேள்விகளை எழுப்பினர். இந்த 5 மணி நேர விசாரணையில், டெண்டர்கள் ஒதுக்கப்பட்ட விதம், நிதி பரிமாற்றம் மற்றும் பறிமுதல் செய்யப்பட்ட ஆவணங்கள் குறித்து அவரிடம் சுமார் 100-க்கும் மேற்பட்ட கேள்விகள் கேட்கப்பட்டதாகத் தகவல் வெளியாகியுள்ளது. அவரின் பதில்கள் அனைத்தும் கணினியில் பதிவு செய்யப்பட்டுள்ளதுடன், ஒட்டுமொத்த விசாரணையும் வீடியோவாகவும் பதிவு செய்யப்பட்டுள்ளதாக அதிகாரிகள் தரப்பில் தெரிவிக்கப்பட்டுள்ளது.
விசாரணை முடிந்து வெளியே வந்த எ.வ.வேலு செய்தியாளர்களைச் சந்தித்து மிகவும் வெளிப்படையாகப் பேசினார். “அதிகாரிகள் கேட்ட அனைத்துக் கேள்விகளுக்கும் 100 சதவீதம் உண்மையான பதில்களை அளித்துள்ளேன்; எப்போது அழைத்தாலும் மீண்டும் ஆஜராகத் தயாராக இருக்கிறேன்” என்று கூறினார். மேலும், காவல்துறை நெருக்கடி தந்ததா என்ற கேள்விக்கு, “காவல்துறை அதிகாரிகள் தங்களது கடமையைச் சட்டப்படி, மிகவும் கண்ணியமாகச் செய்தனர். அவர்கள் மீது எனக்கு எந்தக் கோபமும் இல்லை. அவர்கள் வெறும் அம்பு தான், எய்தவர்கள் வேறு இடத்தில் இருக்கிறார்கள்” என்று கூறி, தவெக அரசு திட்டமிட்டுத் தன் மீது அரசியல் பழிவாங்கும் நோக்கில் இந்த வழக்கை ஜோடித்துள்ளதாகக் குற்றம் சாட்டினார்.
