மத்தியப் பிரதேச மாநிலம் போபாலில் உள்ள இந்திய வன மேலாண்மை நிறுவன வளாகத்தில் செயல்படும் பாரத ஸ்டேட் வங்கி கிளையில், ஓய்வுபெற்ற மூத்த ஐஏஎஸ் அதிகாரி ஏ.பி. ஸ்ரீவஸ்தவா தனது வங்கி லாக்கரைத் திறந்தபோது உள்ளே இருந்த விலைமதிப்பற்ற பொருட்கள் அனைத்தும் மாயமாகியிருந்ததைக் கண்டு அதிர்ச்சியில் உறைந்துபோனார்.
தனது இரண்டு மகள்களுடன் இணைந்து இந்த லாக்கரைப் பயன்படுத்தி வந்த அவர், 2024-ஆம் ஆண்டிற்குப் பிறகு அதனைப் பயன்படுத்தாத நிலையில், வியாழக்கிழமை காலை தனது மகள் சுரபியுடன் வங்கிக்குச் சென்று லாக்கரைத் திறக்க முயன்றபோது அதன் பூட்டு ஜாம் ஆகியிருந்ததால் வங்கி அதிகாரிகளின் உதவியை நாடினார்.
வங்கி அதிகாரிகள் முன்னிலையில் ஒருவழியாக அந்த லாக்கர் திறக்கப்பட்டபோது, உள்ளே வைக்கப்பட்டிருந்த அனைத்துப் பொருட்களும் காணாமல் போய் லாக்கர் முற்றிலும் காலியாக இருந்ததைப் பார்த்து அந்த ஓய்வுபெற்ற அதிகாரி கடும் அதிர்ச்சியடைந்தார்.
இது குறித்து விளக்கமளித்த வங்கிக் கிளை மேலாளர் ஹரீஷ் மெஹ்ரா, லாக்கர் காலியாக இருந்ததை உறுதிப்படுத்தியதோடு, வாடிக்கையாளர் தன் பொருட்களை வேறு ஏதேனும் வங்கி லாக்கரில் வைத்துவிட்டு மறந்திருக்கவும் வாய்ப்புள்ளது எனத் தெரிவித்துள்ளார்.
தற்போது இந்தச் சம்பவம் குறித்து கமலா நகர் காவல்துறையினருக்குத் தகவல் தெரிவிக்கப்பட்டு விசாரணை தொடங்கப்பட்டுள்ள நிலையில், காணாமல் போன தனது பொருட்களை மீட்டுத் தர வேண்டும் என அந்த அதிகாரி கோரிக்கை விடுத்துள்ளார், மேலும் இந்தச் சம்பவத்தால் வங்கியின் மற்ற லாக்கர் வாடிக்கையாளர்களும் அச்சமடைந்துள்ளனர்.
