கர்நாடக துணை முதல்வர் டி.கே.சிவக்குமாரின் பேச்சைக் கண்டிப்பதாகக் காங்கிரஸ் நாடாளுமன்ற உறுப்பினர் மாணிக்கம் தாகூர் தெரிவித்துள்ளார். மேகதாது அணை விவகாரத்தில் டி.கே.சிவக்குமாரின் கோரிக்கை தேவையற்றது என்றும், அவரது கருத்துகள் இரு மாநிலங்களுக்கு இடையிலான நல்லுறவைச் சீர்குலைக்கும் வகையில் அமைந்துள்ளதாகவும் அவர் விமர்சித்துள்ளார்.
தஞ்சாவூரில் இன்று செய்தியாளர்களிடம் பேசிய மாணிக்கம் தாகூர், சொந்தக் கட்சியைச் சேர்ந்த கர்நாடகத் தலைவரின் நிலைப்பாட்டிற்கு எதிராகத் தனது கடுமையான அதிருப்தியைப் பதிவு செய்தார். நதிநீர்ப் பங்கீடு போன்ற முக்கிய விவகாரங்களில் இரு மாநில மக்களின் உணர்வுகளையும் கருத்தில் கொண்டு பொறுப்புடன் பேச வேண்டும் என அவர் வலியுறுத்தினார்.
மேகதாது அணை கட்டும் விவகாரத்தில் மத்திய அரசு எந்தவொரு ஒருதலைப்பட்சமான முடிவையும் எடுக்காமல் நியாயமாக நடந்து கொள்ள வேண்டும் என மாணிக்கம் தாகூர் கேட்டுக்கொண்டுள்ளார். உச்ச நீதிமன்றத் தீர்ப்புகள் மற்றும் காவிரி மேலாண்மை ஆணையத்தின் விதிகளுக்கு உட்பட்டு மத்திய அரசு செயல்பட வேண்டும் என்பதே தமிழக மக்களின் எதிர்பார்ப்பாக உள்ளது.
மேலும், இந்தப் பிரச்சினை தொடர்பாகத் தமிழகத்தில் தற்போதைக்கு அனைத்துக் கட்சிக் கூட்டம் நடத்த வேண்டிய அவசியமில்லை என்றும் மாணிக்கம் தாகூர் கருத்து தெரிவித்துள்ளார். மாநில அரசும், அனைத்து நாடாளுமன்ற உறுப்பினர்களும் இந்த விவகாரத்தில் தமிழகத்தின் உரிமைகளைப் பாதுகாக்கத் தொடர்ந்து குரல் கொடுத்து வருவதாக அவர் சுட்டிக்காட்டியுள்ளார்.
மைசூருவில் பிரதமர் நரேந்திர மோடி முன்னிலையில் கர்நாடக முதலமைச்சர் டி.கே. சிவக்குமார் அவர்கள், “மேகதாதுவில் அணை கட்டுவதை யாராலும் தடுக்க முடியாது” என்றும், மத்திய அரசு இதற்கு இறுதி ஒப்புதல் வழங்க வேண்டும் என்றும் பேசியிருப்பது வன்மையாகக் கண்டிக்கத்தக்கது. உச்ச நீதிமன்றத் தீர்ப்பையும், காவிரி நடுவர் மன்ற இறுதி ஆணையையும் அப்பட்டமாக மீறும் வகையில் கர்நாடக முதலமைச்சர் தொடர்ந்து பிடிவாதப் போக்கைக் கையாண்டு வருகிறார். கூட்டாட்சித் தத்துவத்திற்கு எதிராகவும், தமிழ்நாட்டு விவசாயிகளின் வாழ்வாதாரத்தை அழிக்கும் வகையிலும் அமைந்துள்ள இந்தப் பேச்சை ஒருபோதும் ஏற்றுக்கொள்ள முடியாது. காவிரி நதிநீர் பங்கீட்டில் தமிழ்நாடு ஒரு கீழ்படுகை மாநிலம் என்பதால், நமது உரிமைகளைப் பாதிக்கும் எந்தவொரு திட்டத்தையும் கர்நாடகா தன்னிச்சையாகச் செயல்படுத்த முடியாது. கீழ்படுகை மாநிலங்களின் முழுமையான ஒப்புதல் இன்றி மேகதாது அணை கட்டுவதற்கு மத்திய அரசு எவ்வித அனுமதியும் வழங்கக்கூடாது. தமிழ்நாட்டின் அனுமதியின்றி மேகதாது திட்டத்திற்கு ஒப்புதல் அளிப்பது சட்டவிரோதமானது மட்டுமல்ல, அது டெல்டா மாவட்ட விவசாயிகளின் வாழ்வில் கடும் பாதிப்பை ஏற்படுத்தும் செயலாகும். மேகதாதுவில் கர்நாடகாவால் ஒரு செங்கல்லைக் கூட எடுத்து வைக்க விடாமல் தடுப்பது மத்திய மோடி அரசின் கடமை. தமிழ்நாடு காங்கிரஸ் சார்பில் இந்தத் திட்டத்தை நாங்கள் ஒருபோதும் அனுமதிக்க மாட்டோம்; நமது மாநில உரிமைகளைப் பாதுகாக்க எந்த எல்லைக்கும் சென்று போராடுவோம். இன்று நான் தஞ்சாவூர் செல்லவிருக்கிறேன்; அங்கு இந்த விவகாரம் குறித்து விரிவாகப் பேச உள்ளேன். காவிரி உரிமைக்காகத் தமிழ்நாடு எப்போதும் ஒன்றுபட்டு நிற்கும். தமிழ்நாட்டின் நலனையும், நமது விவசாயிகளின் உரிமையையும் விட்டுக்கொடுக்காமல் பாதுகாக்க எங்களது குரல் தொடர்ந்து ஓங்கி ஒலிக்கும். #TNCongress #Mekedatu
— Manickam Tagore .B
மாணிக்கம் தாகூர்.ப (@manickamtagore) November 14, 2026
“>
தமிழகம் மற்றும் கர்நாடகா ஆகிய இரு மாநிலங்களிலும் காங்கிரஸ் கட்சி முக்கியப் பங்கு வகிக்கும் சூழலில், மேகதாது அணை விவகாரத்தில் இரு மாநிலத் தலைவர்களுக்கும் இடையே ஏற்பட்டுள்ள இந்தக் கருத்து வேறுபாடு அரசியல் வட்டாரத்தில் கவனத்தை ஈர்த்துள்ளது.
