சீன அரசுத் தலைவர் ஷி ச்சின்பிங் மே 7 முதல் 10ஆம் நாள் வரை ரஷியாவில் அரசு முறை பயணம் மேற்கொண்டு, சோவியத் ஒன்றியத்தின் மாபெரும் தேசபக்த போர் வெற்றி பெற்றதன் 80ஆவது ஆண்டு நிறைவுக்கான கொண்டாட்டத்தில் பங்கெடுத்தார்.
இப்பயணத்தின்போது, இரு நாட்டு அரசுத் தலைவர்கள் பேச்சுவார்த்தை நடத்தினர். நெடுநோக்கு ஒத்துழைப்பை உறுதியுடன் ஆழமாக்கி, சீன-ரஷிய உறவின் சீரான மற்றும் உயர்நிலையிலான வளர்ச்சியை முன்னேற்ற வேண்டும் என்றும், இரண்டாவது உலகப் போர் பற்றிய சரியான வரலாற்றுப் பார்வையைப் பரவல் செய்து, ஐ.நாவின் செல்வாக்கு மற்றும் தகுநிலையைப் பேணிக்காத்து, சர்வதேச நியாயம் மற்றும் நீதியைப் பேணிக்காக்க வேண்டும் என்றும் இரு தரப்பினரும் ஒருமனதாக ஒப்புக்கொண்டனர்.
தற்போதைய இரு தரப்புறவை சீனாவும் ரஷியாவும் பெரிதும் பாராட்டின. இரு நாடுகள் ஒன்றுக்கொன்று நெடுநோக்கு மற்றும் பாதுகாப்பு நம்பிக்கையை அளிப்பதோடு, பல்வேறு துறைகளில் ஆழமாக ஒத்துழைப்புகளை மேற்கொண்டு வருவதை இது காட்டியுள்ளது. பரஸ்பர மதிப்பளித்தல், ஒத்துழைப்பின் மூலம் கூட்டு வெற்றி பெறுதல் ஆகியவற்றைக் கொண்ட சீன-ரஷிய உறவு, பெரிய நாடுகளுக்கிடையிலான உறவுக்கு முன்மாதிரியாக திகழ்கிறது.
வளர்ச்சியானது, எல்லா பிரச்சினைகளையும் தீர்ப்பதற்கான முக்கிய அம்சமாகும். வர்த்தகப் பாதுகாப்புவாதம் தலை தூக்குதல், சீரற்ற உலக வளர்ச்சி ஆகியவற்றை கொண்ட சூழ்நிலையில், சீனாவும் ரஷியாவும் வளர்ச்சிப் பாதையில் கூட்டாக முன்னேறி, உலகப் பொருளாதார மீட்சிக்கு இயக்காற்றலை ஊட்டி வருகின்றன. இப்பயணத்தின்போது, முதலீட்டுப் பாதுகாப்பு, எண்ணியல் பொருளாதாரம், நோய் பரிசோதனை, திரைப்படம் உள்ளிட்ட துறைகள் பற்றிய 20க்கும் மேலான ஒத்துழைப்பு ஆவணங்களில் இரு தரப்பும் கையொப்பமிட்டுள்ளன.
மேலும், ஐ.நா, ஷாங்காய் ஒத்துழைப்பு அமைப்பு, பிரிக்ஸ் உள்ளிட்ட பலதரப்பு மேடைகளில் கலந்தாய்வு மற்றும் ஒத்துழைப்புகளை வலுப்படுத்த வேண்டும் என்றும் இரு நாட்டு அரசுத் தலைவர்கள் பேச்சுவார்த்தையில் வலியுறுத்தினர்.
