தமிழகத்தை 60 ஆண்டு காலம் ஆட்சி செய்த திமுக மற்றும் அதிமுக ஆகிய கட்சிகள், நாட்டை அழிவுப் பாதைக்கே கொண்டு சென்றுவிட்டன என்று நாம் தமிழர் கட்சியின் தலைமை ஒருங்கிணைப்பாளர் சீமான் கடுமையாக விமர்சித்துள்ளார். செங்கல்பட்டு மாவட்டம் பல்லாவரத்தில் நடைபெற்ற அக்கட்சியின் பொதுக்கூட்டத்தில் கலந்துகொண்டு சீமான் பேசியதாவது,
தமிழகத்தில் நாம் தமிழர் கட்சி ஆட்சிக்கு வந்தவுடன், சுற்றுச்சூழலுக்குப் பெரும் கேடு விளைவிக்கும் நெகிழி (Plastic) பயன்பாடு முற்றிலுமாக ஒழிக்கப்படும். மக்களின் அடிப்படைத் தேவைகளான தரமான கல்வி மற்றும் உயர்தர மருத்துவம் ஆகிய இரண்டையும் அரசு சார்பில் முற்றிலும் இலவசமாக வழங்குவேன். ஆனால், இவற்றைத் தவிர வேறு எதையும் என்னிடம் இலவசமாக எதிர்பார்க்காதீர்கள். இலவசங்களை விரும்புபவர்கள் தாராளமாக மற்றக் கட்சிகளுக்கே வாக்களித்துக் கொள்ளலாம்.
தமிழகத்தின் அனைத்துத் தெருக்களிலும் சிசிடிவி (CCTV) கேமராக்கள் பொருத்தப்படும். இதன் மூலம் பொது இடங்களில் குப்பைகளை வீசிவிட்டுச் செல்பவர்கள் கண்டறியப்பட்டு, அவர்கள் மீது கடும் நடவடிக்கை எடுக்கப்படும். ஊர் தூய்மையாகப் பராமரிக்கப்படுவது உறுதி செய்யப்படும்.
தொலைக்காட்சியில் வரும் பிக் பாஸ் நிகழ்ச்சியைச் சுட்டிக்காட்டிப் பேசிய அவர், “நான் அந்த நிகழ்ச்சியில் வரும் ‘ரீல்’ (Reel) பிக் பாஸ் அல்ல; மக்களின் குறைகளைக் களைந்து, தவறு செய்பவர்களைக் கண்டிக்கும் உண்மையான ‘ரியல்’ (Real) பிக் பாஸ் நான் தான்,” என்று அதிரடியாகத் தெரிவித்தார். மேலும் இந்தக் கூட்டத்தில் நாம் தமிழர் கட்சியின் நிர்வாகிகள் மற்றும் தொண்டர்கள் பெருந்திரளாகக் கலந்துகொண்டனர்.
