வீரமணி வழக்கில் குற்றவாளிகளைக் காப்பாற்ற திமுக ஆட்சியில் எந்தவித உத்தரவும் பிறப்பிக்கப்படவில்லை என்றும், தன் மீது சுமத்தப்படும் குற்றச்சாட்டுகள் முற்றிலும் பொய்யானவை என்றும் திமுக தலைவரும் முன்னாள் முதலமைச்சருமான மு.க. ஸ்டாலின் திட்டவட்டமாக மறுத்துள்ளார்.
சிறுமிகளுக்கு எதிரான பாலியல் குற்றங்களில் ஈடுபட்ட ஜெம் வீரமணியும், அவருக்கு உடந்தையாக இருந்தவர்களும் சட்டத்தின் முன் நிறுத்தப்பட்டு அதிகபட்ச தண்டனையைப் பெற வேண்டும் என்பதே தனது உறுதியான நிலைப்பாடு என்று அவர் தனது எக்ஸ் சமூக வலைதளப் பக்கத்தில் குறிப்பிட்டுள்ளார்.
இந்த விவகாரத்தை வைத்து எதிர்க்கட்சிகள் குறுகிய அரசியல் லாபம் அடைய முயல்வதாகவும், சிறுமிகளுக்கு ஏற்பட்ட துயரத்தை வரவிருக்கும் இடைத்தேர்தலுக்கான கருவியாகப் பயன்படுத்துவது மிகவும் அருவெறுப்பான செயல் என்றும் அவர் கடுமையாகச் சாடியுள்ளார்.
கடந்த கால திமுக ஆட்சியில் பெண்கள் மற்றும் குழந்தைகளுக்கு எதிரான குற்ற வழக்குகளில் பாரபட்சமின்றி நடவடிக்கை எடுக்கப்பட்டு குற்றப்பத்திரிகையும் தாக்கல் செய்யப்பட்டுள்ளதாகத் தெரிவித்த அவர், எவரையும் காப்பாற்ற வேண்டிய அவசியமும் தேவையும் திமுக அரசுக்கு எப்போதுமே இருந்ததில்லை என்று தெளிவுபடுத்தினார்.
தற்போதைய ஆட்சியில் ஆளுங்கட்சி பிரமுகர்கள் மீதான பாலியல் குற்றச்சாட்டுகள் குறித்து வெளிப்படையாகப் புகார்கள் வந்தாலும், உரிய நடவடிக்கை எடுக்காமல் சமரசம் பேசி வழக்குகளை மூடிமறைக்கும் இழிசெயல்கள் அரங்கேறி வருவதாக மு.க. ஸ்டாலின் குற்றசாட்டியுள்ளார்.
சிறுமிகளுக்கு எதிரான மனிதத்தன்மையற்ற இழிவான செயல்களில் ஈடுபட்ட குற்றச்சாட்டுகளின் அடிப்படையில் ஜெம் வீரமணி கைது செய்யப்பட்டுள்ளார். இதில் வீரமணியும், அவருக்கு உடந்தையாக இருந்தவர்கள், அவரைக் காப்பாற்ற முயன்றவர்கள் எவராயினும், எத்தகைய பொறுப்பில் இருந்தவர்கள் ஆயினும் தப்பிக்க கூடாது. அனைவரும் சட்டத்தின் முன் நிறுத்தப்பட்டு, அதிகபட்ச தண்டனையைப் பெற்றுத் தர வேண்டும். இதுதான் திராவிட முன்னேற்றக் கழகத்தின் நிலைப்பாடு. இந்த வழக்கின் முடிவு, இனி இத்தகைய குற்றச்செயல்களில் ஈடுபடும் எண்ணமே எவருக்கும் வராத வகையில் அமைய வேண்டும் என்பதுதான் ஓர் அரசியல் இயக்கத்தின் தலைவனாகவும், ஒரு குடும்பத்தலைவனாகவும், மனசாட்சி உள்ள மனிதனாகவும் எனது விருப்பம். ஆனால், இந்த வழக்கில் தேவையே இல்லாமல், குறுகிய அரசியல் நோக்கத்துடன் தி.மு.கழகத்தின் மீது பொய்யாக அவதூறுகளைப் பரப்பி, ஒரு கூட்டம் குளிர்காய்ந்து வருவது மிகவும் அருவெறுப்பான செயலாகும். வீரமணி வழக்கில் யாரையும் காப்பாற்ற எந்த உத்தரவும் கழக ஆட்சியில் பிறப்பிக்கப்படவில்லை. பெண்கள், சிறுமிகளுக்கு எதிரான குற்ற வழக்குகளில் பாரபட்சமின்றி குற்றவாளிகள் கைது செய்யப்பட்டு, குற்றப்பத்திரிகையும் தாக்கல் செய்யப்பட்டு, தண்டனை பெற்றுத் தரப்பட்டது. இவை அனைத்தும் பொதுவெளியில் இருக்கும், மறுக்க முடியாத உண்மைகள் ஆகும். எவரையும் காப்பாற்ற வேண்டிய தேவை கழக ஆட்சிக்கு இல்லை. தற்போதைய த.வெ.க. ஆட்சியில் நடப்பதுபோல, சட்டமன்ற உறுப்பினர்கள், மாவட்டச் செயலாளர்கள் உள்ளிட்ட கட்சி நிர்வாகிகள் மீது அனைத்துப் பத்திரிகைகளின் முன்பும் பாதிக்கப்பட்ட பெண்கள் பாலியல் குற்றச்சாட்டுகளை முன்வைத்த பின்னரும், நடவடிக்கை எடுக்காமல், சமரசம் பேசி வழக்கை முடித்து வைக்கும் இழிசெயல்கள் கழக ஆட்சியில் நடைபெறவில்லை. எனவே, சிறுமிகளுக்கு ஏற்பட்ட துயரத்தை இடைத்தேர்தலுக்கான கருவியாகப் பயன்படுத்தும் இழிவான செயலையும், முற்றிலும் பொய்யான அவதூறுகளை ஊடகங்கள் மூலமாக பரப்புவதையும் ஆளும்கட்சியினர் நிறுத்திக் கொள்ள வேண்டும். பாதிக்கப்பட்ட சிறுமிகளுக்கு நீதி பெற்றுத் தருவது மட்டுமே நம் அனைவரின் நோக்கமாகவும் இருக்க வேண்டும் என்று கேட்டுக் கொள்கிறேன்.
— M.K.Stalin (@mkstalin) September 24, 2026
“>
எனவே, ஊடகங்கள் மூலமாகத் தன்மீதும் கட்சியின் மீதும் அநாவசியமான அவதூறுகளைப் பரப்புவதை ஆளும்கட்சியினர் உடனடியாக நிறுத்திக் கொள்ள வேண்டும் என்றும், பாதிக்கப்பட்ட சிறுமிகளுக்கு நீதி பெற்றுத் தருவது மட்டுமே அனைவரின் முதன்மைக் குறிக்கோளாக இருக்க வேண்டும் என்றும் அவர் கேட்டுக்கொண்டுள்ளார்.
