உத்தரகண்டின் நான்கு தாம் யாத்திரையில் தொடர்ந்து புதிய சாதனைகள் பதிவாகி வரும் நிலையில், பத்ரிநாத் தாமத்திலும் பக்தர்களின் எண்ணிக்கை புதிய உச்சத்தை எட்டியுள்ளது. செப்டம்பர் 22-ம் தேதி நிலவரப்படி, இந்த ஆண்டு இதுவரை 17 லட்சத்து 79 ஆயிரத்து 805 பக்தர்கள் பத்ரிநாத் தாமத்தில் தரிசனம் செய்துள்ளனர். ஏப்ரல் 23-ம் தேதி தொடங்கிய இந்த ஆண்டு யாத்திரை, 153 நாட்களிலேயே இந்த எண்ணிக்கையை எட்டியுள்ளது.
உத்தரகண்ட் சுற்றுலாத் துறை தரவுகளின்படி, கடந்த ஆண்டுகளில் பத்ரிநாத் தரிசனத்துக்கு வந்த பக்தர்களின் எண்ணிக்கையில் பல்வேறு ஏற்றத்தாழ்வுகள் இருந்துள்ளன. 2000-ம் ஆண்டு 6 லட்சத்து 95 ஆயிரத்து 332 பேர் தரிசனம் செய்த நிலையில், 2007-ல் இந்த எண்ணிக்கை 7 லட்சத்து 68 ஆயிரத்து 107 ஆக உயர்ந்தது. 2014-ம் ஆண்டு ஏற்பட்ட கடுமையான இயற்கைப் பேரிடர் காரணமாக பக்தர்களின் எண்ணிக்கை 1 லட்சத்து 59 ஆயிரத்து 575 ஆக குறைந்தது.
2018-ல் 10 லட்சத்து 48 ஆயிரத்து 51 பேரும், 2019-ல் 12 லட்சத்து 44 ஆயிரத்து 993 பேரும் பத்ரிநாத் சென்றனர். கொரோனா காலத்தில் இந்த எண்ணிக்கை கணிசமாகக் குறைந்தது. 2020-ல் 1 லட்சத்து 55 ஆயிரத்து 55 பேரும், 2021-ல் 1 லட்சத்து 99 ஆயிரத்து 409 பேரும் தரிசனம் செய்தனர். அதன்பிறகு 2022-ல் 17 லட்சத்து 63 ஆயிரத்து 578 பேரும், 2023-ல் 17 லட்சத்து 80 ஆயிரத்து 429 பேரும், 2024-ல் 17 லட்சத்து 74 ஆயிரத்து 264 பேரும், 2025-ல் 17 லட்சத்து 78 ஆயிரத்து 298 பேரும் தரிசனம் செய்ததாக அந்தத் தரவுகள் தெரிவிக்கின்றன.
வானிலை மேம்பட்டுள்ள நிலையில், பத்ரிநாத்துக்கு வரும் பக்தர்களின் எண்ணிக்கை தொடர்ந்து அதிகரித்து வருவதாக தெரிவிக்கப்பட்டுள்ளது. செவ்வாய்க்கிழமை மட்டும் 6,685 பேர் தரிசனம் செய்துள்ளனர். அதிகரித்து வரும் பக்தர்கள் கூட்டத்தை கருத்தில் கொண்டு, தாம் மற்றும் பயண வழித்தடங்களில் மருத்துவம், பாதுகாப்பு உள்ளிட்ட பயணிகள் வசதிகளில் கவனம் செலுத்தப்பட்டுள்ளதாக முதலமைச்சர் புஷ்கர் சிங் தாமி தெரிவித்துள்ளார்.
