அமெரிக்காவில் அடுத்த மாதம் நடைபெற உள்ள இடைத்தேர்தல் களம் தற்போதே உச்சக்கட்ட பரபரப்பை எட்டியுள்ளது. கன்சாஸ் மாகாணத்தில் நடைபெற்ற பிரமாண்டமான தேர்தல் பிரசாரப் பொதுக்கூட்டத்தில் அமெரிக்க அதிபர் டொனால்ட் ட்ரம்ப் கலந்துகொண்டு மிக ஆவேசமாக உரையாற்றினார். தேர்தலில் குடியரசுக் கட்சி ஆட்சிக்கு வரவில்லை என்றால், அமெரிக்காவின் எதிர்காலம் மிகக் கடுமையான நெருக்கடிகளைச் சந்திக்க நேரிடும் என்று அவர் பொதுமக்களை எச்சரித்தார்.
ஐரோப்பிய நாடான பிரான்சில் நிலவும் கடுமையான விலைவாசி உயர்வு மற்றும் தவறான குடியேற்றக் கொள்கைகளால் மக்கள் மற்றும் இளைஞர்கள் வீதிக்கு வந்து போராடி வருவதைச் சுட்டிக்காட்டிய ட்ரம்ப், அங்கு நடக்கும் வன்முறை கலவரங்களையும் தீப்பற்றி எரியும் கட்டிடங்களையும் சுட்டிக்காட்டினார். இதே நிலைதான் அமெரிக்காவிற்கும் ஏற்படும் என்று எச்சரித்த அவர், “எதிர்க்கட்சியான ஜனநாயகக் கட்சியினர் தங்களது குறுகிய வாக்கு வங்கி அரசியலுக்காக எல்லையற்ற குடியேற்றங்களை ஆதரிக்கிறார்கள்; இது நாட்டின் தேசியப் பாதுகாப்பிற்கு மிகப்பெரிய அச்சுறுத்தலாகும்” என்று கடுமையாக விமர்சித்தார்.
நாட்டைப் பொருளாதாரப் பேரழிவில் இருந்து காப்பாற்றவும், நாட்டின் பாதுகாப்பை உறுதிப்படுத்தவும் பொதுமக்கள் அனைவரும் குடியரசுக் கட்சிக்கு ஆதரவாக வாக்களிக்க வேண்டும் என்று ட்ரம்ப் கேட்டுக்கொண்டார். உள்நாட்டுப் பணவீக்கம் மற்றும் ஈரான் உடனான போர் பதற்றம் போன்ற பல்வேறு உலகளாவிய சவால்களுக்கு மத்தியில் ட்ரம்ப் ஆற்றிய இந்த அதிரடியான மற்றும் ஆவேசமான பேச்சு அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது.
அதிபர் டிரம்பின் இந்தப் பேச்சுக்கு எதிர்க்கட்சியான ஜனநாயகக் கட்சியினர் உடனடியாகத் தங்களது கடும் கண்டனங்களைப் பதிவு செய்துள்ளனர். டிரம்ப் தனது தோல்வி பயத்தின் காரணமாகவே வாக்காளர்களை அச்சமூட்டப் பார்ப்பதாகவும், இல்லாத வதந்திகளைத் திட்டமிட்டுப் பரப்பி வருவதாகவும் அவர்கள் குற்றம் சாட்டியுள்ளனர். இடைத்தேர்தல் நெருங்கி வரும் வேளையில் தலைவர்களின் இந்த அனல் பறக்கும் பிரச்சாரங்கள் அமெரிக்க அரசியலில் பெரும் சூட்டைக்கிளப்பியுள்ளது.
