இந்தியாவின் புனித நதிகளில் ஒன்றாகக் கருதப்படும் கங்கை, உத்தரகண்ட் மாநிலம் ஹரித்வாரில் உள்ள ஹர் கி பௌரி படித்துறையில் தற்போது நீரின்றிக் காட்சியளிக்கிறது. கங்கை கால்வாயில் மேற்கொள்ளப்படும் பராமரிப்பு மற்றும் தூய்மைப் பணிகளுக்காக நீர்வரத்து தற்காலிகமாக நிறுத்தப்பட்டுள்ளதே இதற்குக் காரணம். தண்ணீர் வடிந்ததால் ஆற்றின் அடிப்பகுதியில் தேங்கியிருந்த குப்பைகள் வெளியில் தெரியத் தொடங்கியுள்ளன. இதனால் அந்தப் பகுதியின் தோற்றமே மாறியுள்ளது.
ஹர் கி பௌரி படித்துறைக்கு நாள்தோறும் ஏராளமான பக்தர்கள் வந்து புனித நீராடுவது வழக்கம். ஆனால், தற்போது நீர்வரத்து குறைக்கப்பட்டுள்ளதால் பக்தர்கள் போதுமான தண்ணீரில் நீராட முடியாத நிலை ஏற்பட்டுள்ளது. இதனால் அங்கு வரும் பக்தர்கள் சிரமத்திற்கு உள்ளாகியுள்ளனர். இதற்கிடையே, தண்ணீர் வற்றிய பகுதிகளில் காணப்படும் குப்பைகளை அகற்றும் பணியை நிர்வாகம் தொடங்கியுள்ளது.
கங்கை கால்வாயில் நடைபெறும் பராமரிப்பு மற்றும் தூய்மைப் பணிகள் சுமார் 20 நாள்கள் வரை நடைபெறும் எனத் தெரிவிக்கப்பட்டுள்ளது. இந்தக் காலகட்டத்தில் ஹர் கி பௌரி உள்ளிட்ட பகுதிகளில் குறைந்த அளவிலேயே தண்ணீர் திறந்துவிடப்படும். பணிகள் முடிவடையும் வரை புனித நீராடுவதற்காக அங்கு வருவதைத் தவிர்க்குமாறு நிர்வாகம் பக்தர்களிடம் கேட்டுக்கொண்டுள்ளது.
அதிகாரிகள் தெரிவித்த தகவலின்படி, நவம்பர் 8-ஆம் தேதி காலை மீண்டும் கங்கை நீர் திறந்துவிடப்பட உள்ளது. அதன்பிறகு ஹர் கி பௌரி உள்ளிட்ட படித்துறைகளில் நீர்வரத்து வழக்கமான நிலைக்குத் திரும்பும் என எதிர்பார்க்கப்படுகிறது. கங்கை நதி வறண்டுவிட்டதாகத் தோன்றினாலும், இது நிரந்தரமான நிலை அல்ல; கால்வாயின் பராமரிப்பு மற்றும் தூய்மைப் பணிகளுக்காக மேற்கொள்ளப்பட்ட தற்காலிக நடவடிக்கை என்பது குறிப்பிடத்தக்கது.
