அமெரிக்க-ஈரான் அணுசக்தி ஒப்பந்தத்தின் இறுதி வரைவு பேச்சுவார்த்தை பாகிஸ்தான் தலைநகர் இஸ்லாமாபாத்திற்குப் பதிலாக, கத்தார் நாட்டின் தோஹாவிற்கு மாற்றப்பட்டுள்ளது பாகிஸ்தானுக்குப் பெரும் பின்னடைவை ஏற்படுத்தியுள்ளது.
ஹார்முஸ் ஜலசந்தியைத் திறப்பது மற்றும் ஈரானின் செறிவூட்டப்பட்ட யுரேனியம் இருப்புக்கள் போன்ற முக்கிய விவகாரங்களை இறுதி செய்வதற்காக, ஈரானின் வெளியுறவு அமைச்சர் அப்பாஸ் அராக்சி மற்றும் பேச்சுவார்த்தைக் குழுத் தலைவர் எம்.பி. காலிபாஃப் ஆகியோர் அடங்கிய உயர்மட்டக் குழு திங்களன்று தோஹா வந்தடைந்தது.
முன்னதாக, இந்த அமைதிப் பேச்சுவார்த்தையைத் தனது நாட்டில் நடத்த பாகிஸ்தான் பிரதமர் ஷாபாஸ் ஷெரீஃப் பெரிதும் நம்பியிருந்தார். தற்போது ஈரானும் அமெரிக்காவும் இந்த ஒப்பந்தம் தொடர்பாகக் கொள்கை ரீதியாக ஒருமித்த கருத்தை எட்டியுள்ளதால், இடைக்கால ஒப்பந்தத்தை விரைவில் இறுதி செய்ய இரு நாடுகளும் தீவிரமாக முயன்று வருகின்றன. இந்த முன்னேற்றத்தை அமெரிக்க அதிபர் டிரம்ப்பும் உறுதிப்படுத்தியுள்ளார்.
இருப்பினும், இந்த அணுசக்தி ஒப்பந்தத்தில் இருந்து இஸ்ரேல் முற்றிலும் விலக்கி வைக்கப்பட்டுள்ளது புதிய விவாதத்தைக் கிளப்பியுள்ளது. அமெரிக்க அதிபர் டிரம்ப், இஸ்ரேல் பிரதமர் நெதன்யாகுவின் ஆலோசனைகளைப் புறக்கணித்துவிட்டு இந்த முடிவை எடுத்துள்ளதால், டிரம்ப் நிர்வாகத்திற்கும் இஸ்ரேலுக்கும் இடையே கடும் கருத்து வேறுபாடு நிலவுவதாகக் கூறப்படுகிறது.
உலகளாவிய மற்றும் பொருளாதார அழுத்தங்கள் காரணமாகவே ஈரானுடன் உடன்பாடு எட்ட டிரம்ப் நிர்ப்பந்திக்கப்பட்டதாகத் தெரிகிறது. இந்த ஒப்பந்தம் எப்போது கையெழுத்தாகும் என்பதைப் பொறுத்திருந்துதான் பார்க்க வேண்டும் என்று ஈரான் வெளியுறவு அமைச்சகத்தின் செய்தித் தொடர்பாளர் இஸ்மாயில் பாகாயி தெரிவித்துள்ளார்.
