வடகொரிய அதிபருடன் நான் நல்ல நட்பில் இருக்கிறேன்… டிரம்ப் போட்ட அதிரடி உத்தரவு

Estimated read time 0 min read

ஈரான் விவகாரத்தில் அமெரிக்காவுக்கு தென்கொரியா போதிய ஆதரவு அளிக்கவில்லை என்று அதிபர் டொனால்ட் டிரம்ப் அதிருப்தி தெரிவித்துள்ளார். இதையடுத்து, தென்கொரியாவுடன் திட்டமிடப்பட்டிருந்த கூட்டு ராணுவப் பயிற்சிகளை குறைக்குமாறு பென்டகனுக்கு அவர் உத்தரவிட்டுள்ளார். ஈரானை அணு ஆயுதங்களற்ற நாடாக மாற்றும் அமெரிக்காவின் முயற்சிக்கு தென்கொரியா ஒத்துழைக்க மறுத்ததாக டிரம்ப் கூறியுள்ளார். இதன் காரணமாக இரு நாடுகளுக்கும் இடையிலான பாதுகாப்பு ஒத்துழைப்பில் புதிய சர்ச்சை ஏற்பட்டுள்ளது. டிரம்பின் இந்த முடிவு சர்வதேச அளவில் கவனம் பெற்றுள்ளது.

இந்த வாரம் தொடங்க இருந்த கூட்டு ராணுவப் பயிற்சிகள் அதிக செலவு கொண்டவை என்றும், வடகொரியாவுக்கு தவறான சமிக்ஞையை வழங்குவதாகவும் டிரம்ப் தெரிவித்துள்ளார். தனது ஆட்சிக் காலத்தில் வடகொரியா அமெரிக்காவை அச்சுறுத்தவில்லை என்றும், அந்த நாட்டின் தலைவர் கிம் ஜாங் உன் உடன் தனக்கு நல்ல உறவு இருப்பதாகவும் அவர் குறிப்பிட்டுள்ளார். மேலும், ஈரானின் அணு ஆயுத விவகாரத்தில் அமெரிக்காவின் முயற்சிக்கு ஆதரவு அளிக்குமாறு தென்கொரிய அதிபரிடம் தான் கேட்டதாகவும் டிரம்ப் கூறியுள்ளார். ஆனால், அந்த கோரிக்கைக்கு தென்கொரியா மறுப்பு தெரிவித்ததாக அவர் தெரிவித்துள்ளார்.

இதையடுத்து, தென்கொரியாவுடன் நடைபெற இருந்த கூட்டு ராணுவப் பயிற்சிகளை கணிசமாக குறைக்குமாறு அமெரிக்க பாதுகாப்புத்துறை அமைச்சர் பீட் ஹெக்செத்துக்கு டிரம்ப் உத்தரவிட்டுள்ளார். சுமார் 11 நாட்கள் நடைபெற இருந்த இந்தப் பயிற்சியில் 18 ஆயிரம் தென்கொரிய வீரர்கள் பங்கேற்க திட்டமிடப்பட்டிருந்தது. வடகொரியாவிடம் இருந்து ஏற்படக்கூடிய அச்சுறுத்தல்களை எதிர்கொள்வதற்கான இரு நாடுகளின் ராணுவத் தயார்நிலையை மேம்படுத்துவதே இதன் முக்கிய நோக்கமாகும். வடகொரியா ஐ.நா. தடையை மீறி மீண்டும் பாலிஸ்டிக் ஏவுகணை சோதனைகளை தொடங்கிய சில நாட்களுக்குப் பிறகு இந்தப் பயிற்சிக்கான திட்டமிடல் தொடங்கியது.

டிரம்பின் இந்த முடிவுக்கு அமெரிக்க ஜனநாயகக் கட்சி செனட்டர் மார்க் கெல்லி கடும் எதிர்ப்பு தெரிவித்துள்ளார். கூட்டு ராணுவப் பயிற்சிகளை புறக்கணிப்பது தவறான முடிவு என்றும், இது குறுகிய பார்வையை காட்டுவதாகவும் அவர் விமர்சித்துள்ளார். இதற்கிடையே, ஈரானுடனான பதற்றம் தொடர்ந்து அதிகரித்து வரும் நிலையில், டிரம்பின் இந்த நடவடிக்கை அமெரிக்காவின் வெளியுறவு மற்றும் பாதுகாப்புக் கொள்கையில் மாற்றம் ஏற்பட்டுள்ளதா என்ற கேள்வியையும் எழுப்பியுள்ளது. குறிப்பாக தென்கொரியா மற்றும் வடகொரியா தொடர்பான டிரம்பின் அணுகுமுறை சர்வதேச அரசியல் வட்டாரங்களில் கவனம் பெற்றுள்ளது.

Please follow and like us:

You May Also Like

More From Author