தமிழகத்தில் 12 மற்றும் 10ம் வகுப்பு பொதுத்தேர்வுகள் தற்போது நடைபெற்று வரும் நிலையில் 1 முதல் 9ம் வகுப்பு வரையிலான மாணவர்களுக்கான ஆண்டு இறுதித் தேர்வுகள் எப்போது தொடங்கும் என்ற எதிர்பார்ப்பு நிலவி வந்தது. ஏற்கனவே பள்ளி கல்வித் துறை வெளியிட்டிருந்த கால அட்டவணையின்படி இந்தத் தேர்வுகள் ஏப்ரல் மாதம் 10ம் தேதி முதல் 24ம் தேதி வரை நடத்தத் திட்டமிடப்பட்டிருந்தது.
ஆனால் தமிழக சட்டசபை தேர்தல் ஏப்ரல் மாதம் 23ம் தேதி நடைபெற உள்ளதால் பள்ளித் தேர்வுகளை அதற்கு முன்னதாகவே நடத்தி முடிக்க வேண்டிய கட்டாயம் கல்வித் துறைக்கு ஏற்பட்டுள்ளது. பெரும்பாலான பள்ளிகள் வாக்குச்சாவடி மையங்களாகச் செயல்பட உள்ளதால் வகுப்பறைகளைத் தேர்தல் ஆணையத்திடம் முன்கூட்டியே ஒப்படைக்க வேண்டிய சூழல் நிலவுகிறது.
இதனைத் கருத்தில் கொண்டு 1 முதல் 9ம் வகுப்பு வரையிலான ஆண்டு இறுதித் தேர்வுகளை ஏப்ரல் முதல் வாரத்திலேயே தொடங்கி ஏப்ரல் மாதம் பதினேழாம் தேதிக்குள் முடிப்பதற்குப் பள்ளி கல்வித் துறை தற்போது முடிவு செய்துள்ளது. இதற்கான புதிய தேர்வுக்கால அட்டவணை தயார் செய்யப்பட்டுத் துறைச் செயலாளரின் ஒப்புதலுக்காக அனுப்பி வைக்கப்பட்டுள்ளது.
இந்த அட்டவணைக்கு அனுமதி கிடைத்தவுடன் இன்னும் ஓரிரு நாட்களில் தேர்வு தேதிகள் குறித்த அதிகாரப்பூர்வ அறிவிப்பு வெளியாகும் என்று கல்வித் துறை அதிகாரிகள் தெரிவித்துள்ளனர். தேர்தலுக்கு முன்பாகவே தேர்வுகள் முடிவடைய உள்ளதால் மாணவர்கள் மற்றும் ஆசிரியர்கள் மத்தியில் இந்த அறிவிப்பு முக்கியத்துவம் வாய்ந்ததாகப் பார்க்கப்படுகிறது.
