இந்தியா மற்றும் இங்கிலாந்து அணிகளுக்கு இடையிலான 5 போட்டிகள் கொண்ட டி20 தொடரின் இரண்டாவது போட்டி நேற்று நடைபெற்றது. விறுவிறுப்பாக நடந்த இந்த ஆட்டத்தில், இந்திய அணியின் கையில் இருந்த வெற்றியை இங்கிலாந்து அணி கடைசி நேரத்தில் தட்டிப் பறித்துள்ளது. இப்போட்டியில் முதலில் பேட்டிங் செய்த இந்திய அணி, 20 ஓவர்கள் முடிவில் 7 விக்கெட்டுகளை இழந்து 190 ரன்கள் என்ற இமாலய இலக்கை எட்டியது.
இருப்பினும், இங்கிலாந்து அணி 19 ஓவர்களிலேயே இந்த இலக்கை எட்டி 4 விக்கெட் வித்தியாசத்தில் அதிரடி வெற்றி பெற்றதுடன், தொடரிலும் 1-0 என முன்னிலை பெற்றுள்ளது. இந்திய அணிக்கு ஆட்டத்தின் திருப்புமுனையாக அமைந்த 17-வது ஓவர் தான் ஒட்டுமொத்த தோல்விக்கும் முக்கியக் காரணமாக அமைந்தது.
191 ரன்கள் என்ற இலக்கை நோக்கி களமிறங்கிய இங்கிலாந்து அணியின் ஆரம்பம் மிகவும் மோசமாக இருந்தது. இந்திய வேகப்பந்து வீச்சாளர் அர்ஷ்தீப் சிங், முதல் ஓவரிலேயே இங்கிலாந்தின் இரண்டு தொடக்க ஆட்டக்காரர்களையும் டக்-அவுட் ஆக்கி மிரட்டினார். ஆனால், அதன்பின் களமிறங்கிய ஜேகப் பெத்தேல் அதிரடியாக விளையாடி 76 ரன்கள் குவித்து இங்கிலாந்தை வெற்றியை நோக்கி அழைத்துச் சென்றார்.
Ravi Bishnoi threw away the match single handedly.
England needed 49 runs of 24 balls & India were in the control.Then comes Ravi Bishnoi & throws back to back no balls just to get hammered for 29 runs by Jacob Bethell on free Hits
By the end of over England needed… pic.twitter.com/HJkOAakT2W
— TheFakeFakeer (@TheFakeFakeer) July 4, 2026
இக்கட்டான சூழ்நிலையில், அவரது விக்கெட்டை வீழ்த்த கேப்டன் ஸ்ரேயாஸ் ஐயர், சுழற்பந்து வீச்சாளர் ரவி பிஷ்னோயிடம் பந்தைக் கொடுத்தார். ஆனால், இந்த முடிவு இந்திய அணிக்கு வினையாக முடிந்தது. இங்கிலாந்துக்கு கடைசி 24 பந்துகளில் 49 ரன்கள் தேவைப்பட்டபோது 17-வது ஓவரை வீசிய பிஷ்னோய், இம்ரான் தாஹிர் பாணியில் தனது பந்துவீச்சு முறையை மாற்ற முயன்று, அடுத்தடுத்து இரண்டு நோ-பால்களை வீசி சொதப்பினார்.
இதனைப் பயன்படுத்திய இங்கிலாந்து பேட்ஸ்மேன்கள் ஃப்ரீ-ஹிட் பந்துகளை சிக்ஸர்களாகப் பறக்கவிட்டு ஆட்டத்தை தங்களது கட்டுப்பாட்டுக்குள் கொண்டு வந்தனர். அந்த ஒரே ஓவரில் மட்டும் 28 ரன்கள் வாரி வழங்கப்பட்டது. அதன்பின் இங்கிலாந்துக்கு 18 பந்துகளில் 20 ரன்கள் மட்டுமே தேவைப்பட, 19-வது ஓவரிலேயே அவர்கள் இலக்கை எட்டினர். இந்திய அணியில் அர்ஷ்தீப் சிங் 3 விக்கெட்டுகளை வீழ்த்தினார், மற்றும் அக்சர் படேல் தனது 100-வது டி20 விக்கெட்டை வீழ்த்தி சாதனை படைத்த போதிலும், இந்திய அணியை அவரால் தோல்வியில் இருந்து காப்பாற்ற முடியாமல் போனது.
