ஹிந்தி, தமிழ், தெலுங்கு, கன்னடம் உள்ளிட்ட பல்வேறு மொழிகளில் 100-க்கும் மேற்பட்ட திரைப்படங்களில் நடித்து ரசிகர்களின் மனதில் நீங்காத இடம் பிடித்த பிரபல வில்லன் மற்றும் குணச்சித்திர நடிகர் பிரதீப் ராவத் (74) காலமானார். அவரது மறைவுச் செய்தி இந்தியத் திரையுலகினர் மற்றும் ரசிகர்கள் மத்தியில் பெரும் சோகத்தை ஏற்படுத்தியுள்ளது.
தமிழ்த் திரையுலகில் தனது மிரட்டலான நடிப்பால் தனக்கென தனி வழியை உருவாக்கிக் கொண்டவர் பிரதீப் ராவத். சூர்யா நடிப்பில் வெளியான ‘கஜினி’ திரைப்படத்தில் வில்லனாக நடித்து பெரும் புகழ்பெற்ற இவர், அஜித் குமார் நடிப்பில் வெளியான ‘வீரம்’, சிலம்பரசன் நடித்த ‘தொட்டி ஜெயா’ உள்ளிட்ட பல வெற்றிப் படங்களில் குறிப்பிடத்தக்க முக்கியக் கதாபாத்திரங்களில் ஏற்ற சிறப்பான நடிப்பை வெளிப்படுத்தியுள்ளார்.
ஹிந்தித் திரையுலகில் முன்னணி நடிகர்களின் திரைப்படங்களில் நடித்து தனது கலைப் பயணத்தைத் தொடங்கிய இவர், தென்னிந்திய மொழிகளான தமிழ், தெலுங்கு மற்றும் கன்னடப் படங்களிலும் மிரட்டலான வில்லன் கதாபாத்திரங்களில் நடித்துத் தன் திறமையை நிரூபித்தார். திரையில் கொடூரமான வில்லனாக வலம் வந்தாலும், நிஜ வாழ்க்கையில் பண்பான மனிதராக திரையுலகினரால் மதிக்கப்பட்டவர்.
பிரதீப் ராவத்தின் மறைவுக்குத் திரையுலகப் பிரபலங்கள், நடிகர்கள் மற்றும் ரசிகர்கள் தங்களது ஆழ்ந்த இரங்கல்களைத் தெரிவித்து வருகின்றனர். இந்தியத் திரையுலகிற்கு அவர் ஆற்றிய கலைச்சேவையும், அவர் ஏற்று நடித்த வில்லன் கதாபாத்திரங்களும் சினிமா வரலாற்றில் என்றும் நினைவுகூரப்படும்.
