ஆசிய விளையாட்டு போட்டியின் கோல்ஃப் பிரிவில் இந்தியா தங்கம் மற்றும் வெள்ளிப் பதக்கங்களை கைப்பற்றியுள்ளது.
ஜப்பானில் நடைபெற்று வரும் ஆசிய விளையாட்டுப் போட்டியில் இந்தியா தொடர்ந்து பதக்கங்களை குவித்து வருகிறது. மகளிர் கோல்ஃப் தனிநபர் பிரிவில் இந்தியாவின் பிரணவி உர்ஸ், தங்கப் பதக்கம் வென்று சாதனை படைத்துள்ளார்.
பெண்கள் தனிநபர் கோல்ப் பிரிவில் தங்கப் பதக்கம் வென்ற முதல் இந்திய வீராங்கனை என்ற பெருமையை பிரணவி உர்ஸ் பெற்றுள்ளார்.
இதேபோல், கோல்ஃப் விளையாட்டில் பிரணவி உர்ஸ், அதிதி அசோக், தீக்ஷா தாகர் அடங்கிய மகளிரணி வெள்ளிப் பதக்கத்தை வென்று இந்தியாவுக்கு பெருமை சேர்த்துள்ளது.
வில்வித்தை மகளிர் ரீகர்வ் தனிநபர் பிரிவில், இந்தியாவின் 17 வயதே ஆன கும்கும் அனில் மொஹொத் ஷூட் ஆஃப் முறையில் தங்கம் வென்றார்.
இறுதிப்போட்டியில் கொரியாவின் ஓ-யே-ஜின்னுடன் ஐந்துக்கு ஐந்து என்ற கணக்கில் சமநிலை அடைந்த போது, ஷூட் ஆஃப் முறையில் வீழ்த்தி கும்கும் தங்கப் பதக்கம் வென்றார். இதன்மூலம், 2028ம் ஆண்டு லாஸ் ஏஞ்சல்ஸ் ஒலிம்பிக் போட்டிக்கும் கும்கும் தகுதி பெற்றார்.
ஆசிய வில்வித்தை போட்டியின் ஆடவர் ரீகர்வ் தனிநபர் பிரிவில் இந்தியாவுக்கு வெண்கலப் பதக்கம் கிடைத்துள்ளது. வில்வித்தை ஆடவர் ரீகர்வ் தனிநபர் பிரிவு வெண்கல பதக்கத்துக்கான போட்டியில், இந்திய வீரர் நீரஜ் சவுகான், சக நாட்டு வீரர் திராஜ் பொம்மதேவராவை எதிர்கொண்டார். இதில், 6-4 என்ற கணக்கில் வெற்றி பெற்று இந்திய வீரர் நீரஜ் சவுகான் வெண்கலப் பதக்கம் வென்றார்.
