மத்திய கிழக்கில் நிலவி வரும் பதற்றமான சூழல் மற்றும் கடுமையான பாதுகாப்பு அச்சுறுத்தல்கள் காரணமாக சவுதி அரேபியாவுக்கான விமான சேவைகள் அனைத்தும் அதிரடியாக ரத்து செய்யப்பட்டுள்ளன. குறிப்பாக, அக்டோபர் 17-ஆம் தேதி வரை சவுதி அரேபியாவின் முக்கிய நகரங்களான ரியாத், ஜெட்டா, தம்மாம் மற்றும் மதீனா உள்ளிட்ட இடங்களுக்கு இயக்கப்பட வேண்டிய விமான சேவைகள் தற்காலிகமாக நிறுத்தப்படுவதாகப் பிரபல விமான நிறுவனங்கள் அறிவித்துள்ளன.
இதன் ஒரு பகுதியாக, ரியாத், ஜெட்டா, தம்மாம் மற்றும் மதீனா நகரங்களுக்குச் செல்லவிருந்த அனைத்து இண்டிகோ விமான நிறுவனத்தின் சேவைகளும் வரும் அக்டோபர் 17 வரை ரத்து செய்யப்படுவதாக அதிகாரப்பூர்வமாக அறிவிக்கப்பட்டுள்ளது. இதேபோன்று, மற்றொரு முன்னணி விமான நிறுவனமான ஆகாசா ஏர் நிறுவனமும், ரியாத் மற்றும் ஜெட்டாவுக்கான தனது அனைத்து விமான சேவைகளும் அக்டோபர் 17 வரை முழுமையாக நிறுத்தி வைக்கப்படுவதாகத் தெரிவித்துள்ளது.
மத்திய கிழக்கு நாடுகளில் ஏற்பட்டுள்ள பாதுகாப்புச் சூழல் மற்றும் வான்வெளிப் பாதுகாப்பு தொடர்பான எச்சரிக்கைகள் காரணமாக இந்த முக்கிய முடிவு எடுக்கப்பட்டுள்ளது. விமான சேவைகள் திடீரென ரத்து செய்யப்பட்டுள்ளதால், சவுதி அரேபியா செல்லத் திட்டமிட்டிருந்த பயணிகள் பலரும் விமான நிலையங்களில் கடுமையான அவதிக்கும் குழப்பத்திற்கும் ஆளாகியுள்ளனர். பயணிகள் தங்களது பயணத் தேதிகளை மாற்றிக்கொள்ளுமாறு விமான நிறுவனங்கள் சார்பில் அறிவுறுத்தப்பட்டு வருகின்றனர்.
