தமிழ்நாடு பள்ளிக் கல்வித்துறை பத்தாம் வகுப்பு (10th Standard) மாணவர்களுக்கான பொதுத்தேர்வு கால அட்டவணையை அதிகாரப்பூர்வமாக வெளியிட்டுள்ளது. இந்த அட்டவணையின்படி, பத்தாம் வகுப்பு பொதுத்தேர்வுகள் வரும் மார்ச் மாதம் 10-ம் தேதி தொடங்கி ஏப்ரல் மாதம் 9-ம் தேதி வரை நடைபெறவுள்ளன. முதல் நாளான மார்ச் 10-ம் தேதி தமிழ் பாடத் தேர்வுடன் தேர்வுகள் தொடங்குகின்றன.
இதனைத் தொடர்ந்து மார்ச் 16-ம் தேதி ஆங்கிலப் பாடத் தேர்வும், மார்ச் 20-ம் தேதி கணிதப் பாடத் தேர்வும் நடைபெறுகின்றன. ஏப்ரல் மாதத்தில் ஏப்ரல் 5-ம் தேதி அறிவியல் பாடத் தேர்வும், நிறைவாக ஏப்ரல் 9-ம் தேதி சமூக அறிவியல் பாடத் தேர்வும் நடைபெற்றுப் பொதுத்தேர்வுகள் அனைத்தும் முழுமையாக நிறைவடைகின்றன. மாணவர்களின் தேர்வுத் தயாரிப்பிற்கு ஏதுவாக ஒவ்வொரு பாடத் தேர்விற்கும் போதிய இடைவெளி வழங்கி இந்த அட்டவணை தயாரிக்கப்பட்டுள்ளது.
பொதுத்தேர்வுகள் அனைத்தும் ஏப்ரல் 9-ம் தேதியோடு நிறைவடையும் நிலையில், தேர்வுத்தாள்களைத் திருத்தும் பணிகள் உடனடியாகத் தொடங்கப்படவுள்ளன. இதனைத் தொடர்ந்து, பத்தாம் வகுப்பு பொதுத்தேர்வின் முடிவுகள் வரும் மே மாதம் 20-ம் தேதி வெளியிடப்படும் என்று பள்ளிக் கல்வித்துறை சார்பில் திட்டவட்டமாக அறிவிக்கப்பட்டுள்ளது. இந்த அறிவிப்பால் மாணவர்கள் தேர்வுக்குத் தீவிரமாகத் தயாராகி வருகின்றனர்.
