தமிழ் சினிமாவின் லேடி சூப்பர் ஸ்டார் நயன்தாரா நடிப்பில் மிகுந்த எதிர்பார்ப்பை ஏற்படுத்தியுள்ள ‘மூக்குத்தி அம்மன் 2’ திரைப்படத்தின் மீது ரசிகர்களின் கவனம் முழுமையாகத் திரும்பியுள்ளது.
இப்படத்தில் அம்மன் வேடத்தில் நடித்துள்ள நயன்தாராவின் புகழைப் போற்றும் வகையில், சென்னை பூந்தமல்லி பகுதியில் அவருக்குச் சுமார் 60 அடி உயரத்தில் பிரம்மாண்டமான கட் அவுட் அமைக்கப்பட்டுள்ளது. சினிமா திரையுலக வரலாற்றில் தமிழ்நாட்டில் ஒரு நடிகைக்காக அமைக்கப்பட்டுள்ள மிக உயரமான கட் அவுட் இதுவே ஆகும் எனப் படக்குழுவினர் பெருமிதத்துடன் தெரிவித்துள்ளனர்.
திரைப்பட வெளியீட்டுக்கு முன்பே நயன்தாராவுக்காக வைக்கப்பட்டுள்ள இந்த ராட்சத கட் அவுட் அப்பகுதி மக்களை வியப்பில் ஆழ்த்தியுள்ளது. அம்மன் கோலத்தில் கம்பீரமாக இருக்கும் நயன்தாராவின் இந்த கட் அவுட்டைக் காண ஏராளமான ரசிகர்கள் மற்றும் பொதுமக்கள் திரண்டு வருவதால், அப்பகுதியில் திருவிழா போன்ற கோலாகலமான சூழல் ஏற்பட்டுள்ளது. சமூக வலைதளங்களிலும் இந்த புகைப்படங்களும் வீடியோக்களும் வெளியாகி காட்டுத்தீ போலப் பரவி வருவதுடன், ரசிகர்களின் லைக்குகளையும் குவித்து வருகிறது.
பெண்களை மையப்படுத்திய கதாபாத்திரங்களிலும் சரி, அதிரடியான கதைகளத்திலும் சரி தனது தனித்துவமான நடிப்பால் முத்திரை பதித்து வரும் நயன்தாராவின் மார்க்கெட் தமிழ்நாட்டில் இன்னும் குறையவில்லை என்பதற்கு இந்த பிரம்மாண்ட வரவேற்பே சிறந்த சான்றாகும். ‘மூக்குத்தி அம்மன் 2’ படத்தின் மீதான எதிர்பார்ப்பை இந்த கட் அவுட் நிகழ்வு பல மடங்கு அதிகரித்துள்ள நிலையில், படம் திரைக்கு வரும்போது வசூல் சாதனைகளைத் தகர்க்கும் எனத் திரையுலகினர் எதிர்பார்க்கின்றனர்.
