சென்னை : தமிழகத்தில் நிலவும் மாறிவரும் வானிலைச் சூழல் காரணமாக, அடுத்த சில நாட்களுக்கு மாநிலத்தின் பல்வேறு மாவட்டங்களில் இடி மின்னலுடன் கூடிய மழை பெய்யக்கூடும் என வானிலை ஆய்வு மையம் தெரிவித்துள்ளது. குறிப்பாக டெல்டா மாவட்டங்கள், தென் மாவட்டங்கள் மற்றும் வட கடலோரப் பகுதிகளில் நாளுக்கு நாள் மழையின் தன்மை மாறுபடும் என எதிர்பார்க்கப்படுகிறது.
இன்று (நவம்பர் 11) இராமநாதபுரம் மாவட்டத்தில் ஓரிரு இடங்களில் இடி மின்னலுடன் கூடிய கனமழை பெய்யக்கூடும். மேலும், திருவாரூர், மயிலாடுதுறை, நாகப்பட்டினம், சிவகங்கை, விருதுநகர், தேனி, தென்காசி, தூத்துக்குடி, திருநெல்வேலி, கன்னியாகுமரி மாவட்டங்கள் மற்றும் காரைக்கால் பகுதிகளில் இடி மின்னலுடன் கூடிய மிதமான மழையும், ஏனைய தமிழகப் பகுதிகளில் லேசானது முதல் மிக லேசான மழையும் பெய்யும். அதனைத் தொடர்ந்து நாளையும் (நவம்பர் 12) தஞ்சாவூர், திருவாரூர், மயிலாடுதுறை, நாகப்பட்டினம், புதுக்கோட்டை, இராமநாதபுரம், தூத்துக்குடி, திருநெல்வேலி, கன்னியாகுமரி மற்றும் காரைக்கால் பகுதிகளில் மிதமான மழையும், மேற்கு தொடர்ச்சி மலை மாவட்டங்கள் மற்றும் வட கடலோரப் பகுதிகளில் லேசான மழையும் பெய்யக்கூடும்.
வரும் நவம்பர் 13-ஆம் தேதியன்று மேற்கு தொடர்ச்சி மலை மாவட்டங்கள், வட கடலோர தமிழகம், புதுவை மற்றும் காரைக்கால் பகுதிகளில் ஓரிரு இடங்களில் லேசான மழை பெய்ய வாய்ப்புள்ளது; ஏனைய தமிழகத்தில் பொதுவாக வறண்ட வானிலை நிலவும். அதனைத் தொடர்ந்து நவம்பர் 14-ஆம் தேதியன்று தஞ்சாவூர், திருவாரூர், மயிலாடுதுறை, நாகப்பட்டினம், புதுக்கோட்டை, ராமநாதபுரம், தூத்துக்குடி, திருநெல்வேலி, கன்னியாகுமரி மாவட்டங்கள் மற்றும் காரைக்கால் பகுதிகளில் ஒருசில இடங்களில் மிதமான மழையும், வட கடலோர தமிழகத்தில் மிக லேசான மழையும் பெய்யக்கூடும்.
நவம்பர் 15-ஆம் தேதியன்று இராமநாதபுரம், விருதுநகர், தேனி, தென்காசி, தூத்துக்குடி, திருநெல்வேலி, கன்னியாகுமரி மாவட்டங்களில் மிதமான மழையும், டெல்டா மற்றும் வட கடலோரப் பகுதிகளில் லேசான மழையும் பெய்யக்கூடும். அதனைத் தொடர்ந்து நவம்பர் 16 மற்றும் 17 ஆகிய தேதிகளில் சென்னை, திருவள்ளூர், செங்கல்பட்டு, காஞ்சிபுரம் மற்றும் ராணிப்பேட்டை மாவட்டங்களில் ஓரிரு இடங்களில் மிதமான மழை பெய்ய வாய்ப்புள்ளதாகத் தெரிவிக்கப்பட்டுள்ளது.
