அமெரிக்காவின் கலிபோர்னியா மாகாணத்தில் உள்ள கடற்பகுதியில், பிரம்மாண்டமான சுற்றுலாப் பயணிகள் கப்பலில் இருந்து தவறி நடுக்கடலில் விழுந்த பியானோ கலைஞர் ஒருவர், சுமார் ஒன்பது மணி நேரத்திற்கும் மேலாகத் தன் உயிரைக் காப்பாற்றிக் கொள்ளச் சமுத்திர அலைகளுடன் போராடிய பிறகு மீனவர்களால் அற்புதமாக மீட்கப்பட்டுள்ள சம்பவம் உலக நாடுகளை வியப்பிலும் அதிர்ச்சியிலும் ஆழ்த்தியுள்ளது.
கடந்த வெள்ளிக்கிழமை அதிகாலை நேரத்தில் இந்த எதிர்பாராத விபத்து நிகழ்ந்திருக்கலாம் என்று அஞ்சப்படும் நிலையில், அந்த நபர் நடுக்கடலில் தத்தளித்துக் கொண்டிருந்தபோது எங்குச் செல்வது என்று தெரியாமல் தவித்த அந்தத் தருணங்கள் பார்ப்போரின் நெஞ்சைப் பதற வைப்பதாக அமைந்துள்ளன.
மேலும் மிகப்பெரிய கப்பலில் இசைக் கலைஞராகப் பணிபுரியும் ஒருவன், திடீரெனக் கடலின் நடுவே தனியாக மாட்டிக் கொண்டு உயிர் பிழைக்க நடத்திய இந்த மாபெரும் போராட்டம் தற்போது உலகளாவிய ஊடகங்களில் பேசுபொருளாகியுள்ளது.
கலிபோர்னியாவின் நியூபார் கடற்பகுதிக்கு அருகில் உள்ள கேடலினா தீவு அருகே மீன் பிடித்துவிட்டுத் தங்களது சிறிய படகில் கரை திரும்பிக் கொண்டிருந்த சீன் நார்ட்டன் மற்றும் கிராண்ட் என்ற இரண்டு மீனவர்கள், சமுத்திரத்தின் நடுவே மிதந்து கொண்டிருந்த மனிதர் ஒருவரைக் கண்டு அதிர்ந்துபோய் உடனடியாகப் படகை நிறுத்தியுள்ளனர்.
மேலும் அவர்கள் உடனடியாகத் தங்களது மீட்பு உபகரணங்களைப் பயன்படுத்தி அந்த நபரைப் பாதுகாப்பாகப் படகிற்குள் இழுத்துத் தூக்கிய போது, அவர் கடும் அதிர்ச்சியிலும் குளிரிலும் நடுங்கிக் கொண்டிருந்ததுடன், தம்மைக் காப்பாற்றிய மீனவர்களிடம் “நன்றி, நான் இனி இறந்துவிடுவேன் என்றுதான் நினைத்தேன்” என்று கூறி அழுதுள்ளார்.
இதனால் உடனடியாகக் கடலோரக் காவல்படையினருக்கும் மருத்துவக் குழுவினருக்கும் தகவல் தெரிவிக்கப்பட்டதை அடுத்து, அவர் பத்திரமாக மீட்கப்பட்டு அருகில் உள்ள மருத்துவமனைக்குச் சிகிச்சைக்காக அனுப்பி வைக்கப்பட்டுள்ளார்.
அதிகாரப்பூர்வ தகவல்களின்படி, அந்த நபர் ராயல் கரீபியன் நிறுவனத்திற்குச் சொந்தமான ‘ஓவேஷன் ஆஃப் தி சீஸ்’ என்ற பிரம்மாண்டமான 14 டெக் கொண்ட கப்பலில் பியானோ கலைஞராக வேலை பார்த்து வருபவர் என்பது தெரியவந்துள்ளது.
சமுத்திரத்தின் தண்ணீர் குறிப்பிட்ட அளவுக்கு இதமாக இருந்ததும், அந்த மனிதரின் உடல்திறனும் மட்டுமே அவர் இவ்வளவு நீண்ட நேரம் உயிரோடு இருக்க உதவியாக இருந்திருக்க வேண்டும் என்று மீட்புக் குழுவினர் வியப்புடன் தெரிவித்துள்ளனர்.
இவ்வளவு பெரிய கடலின் நடுவே தவறி விழுந்த ஒருவன் ஒன்பது மணி நேரம் தொடர்ந்து நீந்திக் கொண்டிருந்து உயிர் பிழைத்திருப்பது மருத்துவ உலகத்தையே ஆச்சரியத்தில் ஆழ்த்தியுள்ளதுடன், சாகச உலகத்தில் ஒரு புதிய அதிசய நிகழ்வாகவும் இது பார்க்கப்பட்டு வருகிறது.
