Web team
மனிதர்கள் மிருகமாகலாமா ? கவிஞர் இரா .இரவி !
கௌரவக் கொலையில் கௌரவம் இல்லை
கொலைக்குப் பின் காற்றில் பறக்குது கௌரவம் !
உயிரினங்களில் உயர்வானது மனிதஇனம்
உயிர்களைக் கொன்று இழிவானது மனிதஇனம் !
விலங்கிலிருந்து மனிதன் வந்தது பரிணாமம்
விலங்காக மனிதன் மாறுவது அவமானம் !
மிருகங்களிடம் மனிதம் உள்ளது காண்கிறோம்
மனிதர்கள் மிருகமாவது உள்ளபடி வெட்கம் !
நாய் பூனைக்கு பால் தந்ததைப் பார்த்தோம்
நாயைவிட மோசமாக மனிதன் மோதுகின்றான் இன்று !
தன் குட்டியைக் காக்க பெரிய விலங்கோடு போராடுகிறது
தன் குட்டி என்றும் பாராமல் வெட்டுகின்றான் மனிதன் !
விலங்குகள் கூட தன் இனத்தைக் கொல்வது இல்லை
மனிதன் தன் குடும்பத்தையே கொல்கின்றான் !
ஆதியில் இல்லையடா இந்த கொடிய சாதி
பாதியில் கற்பித்த மடமையடா சாதி !
கணினி யுகத்திலும் காட்டுமிராண்டிக் கொலைகள்
குனிவை தலைகுனிவை ஏற்படுத்தும் கொலைகள் !
உலகில் வேறு எங்கும் இல்லை கொடிய சாதி
உன்னத தமிழகத்திற்கு தலைகுனிவு சாதி வெறி !
கோடிப்பணம் கொட்டிக் கொடுத்தாலும்
கொன்ற உயிரைத் திரும்பத்தர முடியாது !
விலை மதிப்பில்லா மனித உயிர்கள்
விலை போகலாமா ? சாதி வெறிக்கு !
உண்ணும் உணவை விளைவித்தவன் சாதி தெரியுமா ?
உடுக்கும் ஆடைநெய்தவன் சாதி தெரியுமா ?
விபத்தின் போது ஏற்றப்பட்ட இரத்தம் என்ன சாதி தெரியுமா ?
வீம்புகளை விடுத்து மனிதம்பேணி மனிதனாக வாழுங்கள் !
பலசாதி உழைப்பாளிகளின் பங்களிப்பே உன் வாழ்க்கை
பெரியசாதி சின்னசாதி என்பதில் உண்மை இல்லை !
விலங்கிற்கும் மனிதனுக்கும் வேறுபாடு பகுத்தறிவு
விலங்குவெறி விடுத்து பயன்படுத்திடு பகுத்தறிவு !
உழைப்பவன் தாழ்ந்தவன் அல்ல உயர்ந்தவன்
உழைக்காதவன் தான் தாழ்ந்தவன் உணருங்கள் !
தீண்டாமை பாவச்செயல் உரைத்தார் காந்தியடிகள்
தமிழகத்தில் தீண்டாமை அழிந்து மனிதம்மலரட்டும்
சாதி வெறியால் சாதித்து என்ன ? சிந்திப்பீர்
சாதிவெறியால் செத்த உயிர்கள் போதும் ! சிந்திப்பீர்
ஆணவக்கொலை இனி வேண்டாம் மனிதனே
ஆணவத்தை நீ கொலை செய்தால் போதும் !
