தமிழகத்தில் பண்டிகை காலங்களில் அமைதியை நிலைநாட்டவும், சட்டம் – ஒழுங்கு பிரச்சினைகளை தடுக்கவும் தமிழக அரசு ஒரு முக்கியமான முடிவை நோக்கி நகர்ந்துள்ளது. இதன்படி, முக்கியப் பண்டிகை தினங்களிலும், அதற்கு முந்தைய நாளிலும் மாநிலம் முழுவதும் உள்ள டாஸ்மாக் மதுபானக் கடைகளுக்கு விடுமுறை அளிப்பது குறித்து முதலமைச்சர் விஜய் தலைமையில் நடைபெற்ற உயர்மட்ட ஆலோசனைக் கூட்டத்தில் தீவிரமாக விவாதிக்கப்பட்டுள்ளதாகத் தகவல்கள் வெளியாகியுள்ளன.
பொதுவாகப் பண்டிகை நாட்களில் கொண்டாட்டங்கள் களைகட்டும் வேளையில், மது அருந்துவதால் ஏற்படும் தகராறுகள் மற்றும் அசம்பாவிதச் சம்பவங்கள் பொதுமக்களுக்குப் பெரும் அச்சுறுத்தலாக மாறுகின்றன. குறிப்பாக, சமீபத்திய பண்டிகை காலங்களில் மது போதையால் ஏற்பட்ட சட்டம் – ஒழுங்குப் பிரச்சினைகள் அரசின் கவனத்திற்குக் கொண்டு செல்லப்பட்டன.
இதனை முற்றிலுமாகக் கட்டுப்படுத்தும் நோக்கில், பண்டிகை நாளன்று மட்டுமல்லாமல், முன்னெச்சரிக்கை நடவடிக்கையாக அதற்கு முந்தைய நாளும் மதுபானக் கடைகளை மூடி வைக்க அரசு திட்டமிட்டுள்ளது. தற்போதைய நடைமுறைப்படி, தமிழகத்தில் திருவள்ளுவர் தினம், குடியரசு தினம், வடலூர் இராமலிங்கர் நினைவு நாள், மகாவீர் ஜெயந்தி, மே தினம், சுதந்திர தினம், மிலாதுன் நபி மற்றும் காந்தி ஜெயந்தி ஆகிய 8 நாட்களுக்கு மட்டுமே டாஸ்மாக் கடைகளுக்கு விடுமுறை அளிக்கப்பட்டு வருகிறது.
இந்தப் பட்டியலில் முக்கியப் பண்டிகை நாட்களும் இணையும் பட்சத்தில், டாஸ்மாக் விடுமுறை நாட்களின் எண்ணிக்கை கணிசமாக உயரும். பொதுமக்கள் எந்தவித அச்சமுமின்றிப் பண்டிகைகளை மகிழ்ச்சியுடன் கொண்டாடுவதை உறுதி செய்யும் வகையில் எடுக்கப்பட்டுள்ள இந்த முடிவு, சமூக ஆர்வலர்கள் மற்றும் பொதுமக்களிடையே வரவேற்பைப் பெற்றுள்ளது. முதலமைச்சர் விஜய் தலைமையிலான இந்த ஆலோசனையைத் தொடர்ந்து, பண்டிகை கால டாஸ்மாக் விடுமுறை குறித்த அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது.
