அமெரிக்க அரசு பாகிஸ்தானில் இயங்கும் பிரிவினைவாத அமைப்பான பலூசிஸ்தான் விடுதலைப்படை (Balochistan Liberation Army – BLA) மற்றும் அதன் ஆயுதப் பிரிவான மஜீத் பிரிகேடை வெளிநாட்டு பயங்கரவாத அமைப்பாக (Foreign Terrorist Organization – FTO) அறிவித்தது.
இந்த அறிவிப்பு, பாகிஸ்தான் ராணுவத் தளபதி ஃபீல்டு மார்ஷல் அசிம் முனீர் அமெரிக்காவிற்கு பயணம் மேற்கொண்டிருக்கும் நேரத்தில் வெளியாகியுள்ளது.
பலூசிஸ்தான் மாகாணத்தில் இயங்கும் BLA, பாகிஸ்தானிடமிருந்து பிரிவினை கோரி, கடந்த 2019-ல் அமெரிக்காவால் குறிப்பிடப்பட்ட உலகளாவிய பயங்கரவாத அமைப்பாக (Specially Designated Global Terrorist – SDGT) பட்டியலிடப்பட்டிருந்தது. இந்த முறை, மஜீத் பிரிகேடையும் BLA-வின் புனைப்பெயராக சேர்த்து, FTO பட்டியலில் இணைத்துள்ளது. 2024-ல் கராச்சி விமான நிலையம் மற்றும் குவாதர் துறைமுக வளாகத்தில் நடந்த தற்கொலைத் தாக்குதல்கள், 2025-ல் ஜாஃபர் எக்ஸ்பிரஸ் ரயில் கடத்தல் உள்ளிட்ட பல தாக்குதல்களுக்கு BLA பொறுப்பேற்றுள்ளது.
அமெரிக்க வெளியுறவுத்துறை அமைச்சர் மார்கோ ரூபியோ, “பயங்கரவாதத்திற்கு எதிரான போரில் இந்த அறிவிப்பு முக்கிய பங்கு வகிக்கிறது. இது BLA-விற்கு ஆதரவை தடுப்பதற்கு பயனுள்ள வழியாக இருக்கும்,” என்று தெரிவித்தார். இந்த நடவடிக்கை, அமெரிக்க குடிமக்கள் BLA-விற்கு ஆதரவளிப்பதை தடை செய்யும். பாகிஸ்தான் பலூசிஸ்தான் முதலமைச்சர் சர்ஃப்ராஸ் புக்டி, இந்த முடிவை வரவேற்று, பாகிஸ்தான் அரசு மற்றும் அசிம் முனீரின் முயற்சிகளுக்கு நன்றி தெரிவித்தார்.
இந்த அறிவிப்பு, பாகிஸ்தானுக்கும் அமெரிக்காவிற்கும் இடையேயான உறவை மேலும் வலுப்படுத்துவதாக பார்க்கப்படுகிறது. அசிம் முனீரின் அமெரிக்க பயணத்தின் போது, பாகிஸ்தான் பயங்கரவாதத்திற்கு எதிரான தனது நிலைப்பாட்டை வலியுறுத்தியதாகவும், இது BLA-வை பயங்கரவாத அமைப்பாக அறிவிப்பதற்கு வழிவகுத்ததாகவும் தகவல்கள் வெளியாகியுள்ளது என்பதும் குறிப்பிடத்தக்கது.
