சென்னை : தமிழக சட்டமன்றத் தேர்தலில், சென்னை சேப்பாக்கம் சட்டமன்றத் தொகுதியில் திமுக சார்பில் மீண்டும் போட்டியிடும் திமுக இளைஞரணி செயலாளரும், துணை முதலமைச்சருமான உதயநிதி ஸ்டாலின் இன்று வேட்புமனு தாக்கல் செய்தார்.சேப்பாக்கம் தொகுதி தேர்தல் நடத்தும் அலுவலர் சுகந்தி முன்னிலையில் உதயநிதி ஸ்டாலின் தனது வேட்புமனுவை தாக்கல் செய்தார்.
இது அவரது இரண்டாவது முறை சேப்பாக்கம் தொகுதியில் போட்டியிடும் நிகழ்வாகும்.சேப்பாக்கம் தொகுதி நீண்ட காலமாக திமுகவின் கோட்டையாகக் கருதப்படும் பகுதியாகும். 1977, 1980 மற்றும் 1984 ஆகிய தேர்தல்களில் திமுகவின் ரகுமான் கான் தொடர்ச்சியாக மூன்று முறை வெற்றி பெற்றார். 1991-ல் காங்கிரஸ் வேட்பாளர் ஜீனத் சர்புதீன் வெற்றி பெற்ற நிலையில், 1996, 2001 மற்றும் 2006 ஆகிய தேர்தல்களில் மறைந்த முன்னாள் முதலமைச்சர் கருணாநிதி இந்தத் தொகுதியில் தொடர்ந்து வெற்றி பெற்றார்.
அதன்பிறகு 2011 மற்றும் 2016 தேர்தல்களில் திமுகவின் ஜெ. அன்பழகன் வெற்றி பெற்றார். 2021 சட்டமன்றத் தேர்தலில் முதன்முறையாக உதயநிதி ஸ்டாலின் சேப்பாக்கம் தொகுதியில் திமுக சார்பில் களமிறக்கப்பட்டார். அப்போது 93,285 வாக்குகள் பெற்று பெரிய வெற்றியைப் பெற்றார்.இந்த முறையும் திமுக சார்பில் உதயநிதி ஸ்டாலின் மீண்டும் சேப்பாக்கம் தொகுதியில் போட்டியிடுகிறார்.
அவருக்கு எதிராக அதிமுக சார்பில் ராஜாராம், நாம் தமிழர் கட்சி சார்பில் ஆயிஷா பேகம் மற்றும் தமிழக வெற்றி கழகம் (தவெக) சார்பில் டி. செல்வம் ஆகியோர் போட்டியிட உள்ளனர்.சேப்பாக்கம் தொகுதி திமுகவுக்கு எப்போதும் வலுவான ஆதரவு உள்ள இடமாக இருந்து வருவதால், உதயநிதி ஸ்டாலின் இரண்டாவது முறையும் வெற்றி பெறுவார் என்று திமுக தரப்பில் நம்பிக்கை நிலவுகிறது. இந்தத் தொகுதியில் உதயநிதி ஸ்டாலின் வெற்றி பெற்றால், அவர் தொடர்ந்து இரண்டாவது முறையாக சட்டமன்ற உறுப்பினராகப் பதவி வகிப்பார்.
